古天后日誌｜通關消息刺激港股二萬關結算

12月28日，天晴，早上清涼，天氣乾燥。隔晚美股假期後表現偏軟，雖然道指仍錄得37點升幅，但標指高開低走，跌15點；納指跌幅更超過1%，跌144點。唔少人仲放緊假，過兩日又新年，成交薄弱，喺缺乏買盤支持下，自然易跌難升。標指已失守3900大關，好友唯有退守3800，目前美股去向仍然要睇息口何去何從。美國聯儲局持續放鷹，10年期債息回升至3.85%，之前10年債息跌穿3.5%，市場預期未來減息1%似乎過份樂觀。

債息回升科技股自然走弱，而喺美股呢一波反彈行情以嚟，科技股一直跑輸，低息借錢瘋狂擴大版圖呢枝歌仔喺息口回升下無得再唱，科技股難再以低成本借貸燒錢擴版圖，反而要擔心一直借貸渡日嘅高槓桿科技，能夠捱得過，抑或破產收場。Tesla係較明顯嘅派發例子，股價喺大量沽空倉位累積下，股價持續下跌，再咁跌法，恐怕連三位數都難保。除咗Tesla跌到一仆一碌，就連蘋果公司呢間坐擁大量現金嘅實力派，一樣捱沽，股價已逼近52周低位128.6美元，就連蘋果公司咁穩陣，持大量現金嘅科技股都缺乏買盤支持，可見科技股弱得緊要。

雖然美股科技股弱過藥煲，但中概股喺內地落實通關消息後，表現強硬，只不過中概股升勢唔夠全面，Tesla跌跌不休，電車股三傻跟跌，其他中概股升勢唔算顯著，只有出行股表現較強。A股並未有聖誕假期，過去兩日內地股市上升，只係升勢唔算強勁之餘，成交亦唔算暢旺，深滬兩市成交未及萬億，可見入場資金唔算積極。

至於港股今日放完聖誕節假返嚟，明日就期指結算，估計借通關消息高開，大戶亦可順勢喺高位轉倉。內地喺疫情大爆發之際決定通關，印度跟日本已先後調整對中港澳旅客入境措施，喺疫情大爆發之際通關，是福是禍難料，幸而新冠病毒經多次變種後，殺傷力已大不如前，重症或死亡數字只要唔嚴重，內地大規模感染後能逐步復常，唔再堅持清零封關封城，長遠都係好事。目前要睇阿爺會否再推任何推動經濟措施，炒完通關消息後，中港兩地股市要再推高，就要睇有冇刺激經濟措施出台，升勢方可得延續。值得留意係年結推高進行window dressing，1月基金需進行資產配置，喺二萬水平進行配置嘅話，又會否真係高咗啲，大戶真係有心再推高大市? 抑或年結之後回復平靜，應該要過埋呢個星期先有答案。