古天后日誌｜長假逼近港股轉靜提早收爐

12月19日，天晴，天氣乾燥，早晚寒冷。上周五美股四重期結算，美股三大指數下跌，道指跌281點，標指跟納指分別跌43點及105點。留意標指跌穿3900重要支持位，若然呢兩日未能重返3900之上，美股或轉勢。雖然通脹已有回落之勢，但美聯儲局未敢鬆懈，並仍然口硬，未有放鴿。10年債息維持喺3.5%徘徊，市場仍然相信息率明年見頂，嚟緊都係要睇住通脹回落速度有幾快，目前嘅息口已預示明年大約將減息1%，至於明年美國有冇減息條件，通脹跟就業市場表現仍然係關鍵。值得留意係11月零售數據意外地下跌0.6%，呢個有可能反映裁員潮下，消費意欲受影響，亦有可能係息率上升打擊需求。零售銷售放緩將窒礙經濟增長，影響GDP表現，不利企業營收，呢一點不得不提防。

至於美匯指數回落，人民幣回升，重返七算之下，但目前似無力再向上，反映短線已再無熱錢流入，11月外資開始流入A股炒通關，但喺內地進一步優化防疫措施後，A股反而停滯不前。而近日內地已明顯調整抗疫政策，外資反而未見積極買貨，除咗係年結關係，要預留資金喺明年1月再作配置外，有關通關及放鬆抗疫消息已被市場消化得七七八八。

至於港股上周未有跟隨美股大幅向下，目前仍穩守於19000水平之上，臨近聖誕節長假期，每日成交額仍能維持喺1000億之上，已經算係咁。雖然入市資金放緩，但市場內游資仍然於各板塊之間輪動，氣氛方面已算不俗。本月恒指已成功達標，曾高見20000水平，目前仍於19000水平之上，步入整固期，反有利後市發展。港股本周將轉趨淡靜，下周假期後已接近期指結算，若然本周變化不大，未見向下回補12月初遺下嘅裂口，即約18600-18800水平，港股已相當強勁，即使呢段時間要補裂口，只要仍守100日線，目前已下移至18200-300左右，港股後市仍有條件繼續向上。但礙於喺19000水平上值博率有限，假期前都係食下花生，咪咁多手，提早收爐放假不失為本周一個上佳策略。