古天后日誌｜市場對通關消息已不如之前興奮

12月14日，多雲，天氣寒冷，間中有幾陣雨，大家要著夠衫先好出門口。隔晚美股表現反覆，11月份CPI低過預期，道指一度急升逾700點，但市場趁好消息出貨，最終三大指數維持上升，但升幅大大收窄，道指升103點；標指升23點；納指升113點。標指一度升抵4100水平，但呢個阻力唔易過，睇嚟短期仍然喺3900至4100之間上落，美股都係喺高位反覆震盪。

雖然CPI低過預期，但周四FOMC議息，市場憂慮鷹鴿兩派意見仍分化，即使鴿派會借今次CPI低於預期爭取減慢甚至停止加息，以防經濟硬著陸，但鷹派喺通脹只係啱啱開始回落嘅關鍵時刻，一旦放慢加息過早放鬆貨幣政策，之前加息壓抑通脹嘅功夫或白廢，尤其係聯儲局未有及時喺年初大幅加息以壓抑通脹，已為市場指反應過慢令通脹失控，斷估聯儲局唔咁快放水。

隨著房租回落，11月份核心CPI回落至6%，預期房租未來3個月仍繼續下跌，進一步拉低核心CPI增幅。不過鮑爺一直擔心喺美國經濟放緩，大量科技企業裁員嘅情況下，但美國每小時薪金年增長仍高企於5.09%高位，薪金增幅連降7個月後，喺11月再度回升，居民收入增將激消費意欲，屆時又拉高物價，通脹隨時翻生。估計聯儲局唔會喺短期之內放鬆銀根，美股即使唔出現深度調整，但短線難再向上突破，繼續現水平上落。

港股隔晚夜期跟ADR曾跟隨美股重上二萬大關，不過ADR成交有限，夜期亦係大戶說了算，隨住美股反覆，升幅收窄，港股夜期亦打回原形。至於港股呢排繼續借放鬆防疫措施及通關等消息炒作，不過市場反應已不如之前咁興奮。而港府噚日宣布今日起取消安心出行進入指定處所掃碼安排，但保留疫苖通行證，只係取消黃碼，方便來港人任抵港後可自由活動，但對未合符疫苖要求嘅港人或來港人士，活動自由一樣受限。

雖然有消息指中港兩地於下月初將全面通關，不過市場對呢個消息反應已大不如前，睇返噚日成交額只有1240億元，即係現水平願意再追貨資金已減少，而通關消息亦早已偷步落鑊炒作，反而小心消息公布後，好消息出貨。暫時呢個月再上升空間有限，可能呢段時間都係19000至20000水平之間上落，只要大市仍守10日線，大約係18400水平，後市仍可審慎樂觀。