頭條戲場丨《五腥級盛宴》大巴大巴摑死你班虛偽怪

一部諷刺食評家、鍾意食裝修嘅作狀友、愈難Book愈想Book的虛偽L及打卡KOL的黑色驚慄喜劇。無論是「追星」老饕、快餐愛好者、大排檔常客定覺得高級餐廳得個貴字的酸民都啱睇，而且仲會睇得好有快感，恥笑位相當到肉，兩小時不斷笑出聲，娛樂性非常豐富，套戲講到咁白會唔會得罪好多人㗎？（上映中）撰文：廖思慧
 

Tyler臨時邀請Margot去隱世餐廳，後者聽到每位$1,250美元即刻爆粗。

Ralph Fiennes演嘅廚神好有氣勢，一拍手我就驚驚。

Margot對廚神的食物覺得不外如是，激起廚神的好奇心。

享譽國際的星級廚神Julian Slowik（Ralph Fiennes飾)在西北太平洋小島上開設一間隱世餐廳Hawthorn，叫得隱世都知價錢唔會平，冇錯，Tasting Menu每位$1,250美元（約9,700港幣），咪以為畀得起錢就有得食，Sorry，每晚限定12名賓客，有錢有面都未必排到你，愈難Book愈多人爭住Book，一位難求，話畀人聽Book到已經好似贏咗全世界。

小島上所有種嘅嘢都食得。

每枱有一個唔見得光的故事

廚神頭號靚仔粉絲Tyler（Nicholas Hoult飾）及寸嘴女伴Margot（Anya Taylor-Joy飾）、著名食評家及編輯、過氣電影紅星及助手、超富貴老夫婦常客，及年青才俊有幸成為座上客。電影節奏好緊湊，一開場眾賓客登上接駁船到小島開始已經好緊張，侍應從環境及食材開始介紹，每日在海邊捉到乜就食乜，就算伴碟的石頭及花都取之島上，然後七道料理都有一個好有意思的名稱，如七宗罪，跟身有屎的賓客真係好匹配。

餐廳真係好隱世，有咩事死路一條。

食評家同編輯，前者經常用一堆作狀嘅字去形容食物，個人喜好掌握餐廳的生殺大權。

眾廚師被廚神洗晒腦，連條命都可以唔要。

周洪飾演廚神得力助手，講每句說話都令人不寒而慄。

富貴夫婦係Hawthorn常客，幫襯過十幾次，但完全唔記得之前食過乜，抵鬧。

Margot一早發現廚神唔妥，所以見到任何精緻食物都唔願食。

去到中後段，劇情急轉直下，進入驚悚片模式，有血，嚇人，但同樣好多笑位，節奏更快，廚神由優雅地挖苦到開到口力斥得個殼的美食文化，特別怒轟操生殺大權的美食評論家及連自己食過乜都唔知，只掛住晒命打卡的KOL。故事荒誕又有創意，視覺呈現有美感，對白簡而精又好笑，如果廚神背景可以講多啲就更好，留意廚神阿媽，全片最黐線角色。

電影去到中後段劇情急轉直下，食完好嘢再同你玩月黑風高殺人夜。

冇錯，有個食客想打爛玻璃逃走，好欣賞佢肯去打爛呢個行為，起碼試過。

Anya Taylor-Joy戲中超靚，fans入場睇佢都值回票價。

睇Nicholas Hoult個慘樣都估到廚神同佢一定講衰嘢，不過佢都唔係好人，唔抵可憐。

 

製作人特別請來米芝蓮三星大廚親自主理電影中出現的每一道仿如藝術品的精緻菜式，還有Netflix大熱美食節目《Chef’s Table》創作人擔任顧問，並且參考了多家舉世知名的星級餐廳包括Noma、French Laundry、El Bulli 和Fäviken，以一絲不苟的美術、攝影、場景和服飾設計，呈現一個真實感十足的Fine Dining美食世界。

 

石同花都取之島上，咁大盤嘢只係食石上面嗰件帶子。

好作狀嘅份子料理，好哋哋一件肉唔得嘅，係都打到變成泡。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ