貓B「鴛鴦」失蹤一周 抱貓男今歸還 主人：「我依家開心返 唔追究件事」

大角嘴士多「貓B店長」「鴛鴦」疑遭男途人盜走一個星期，經本網昨（7日）報道偷貓事件後，涉嫌偷貓賊今凌晨主動聯絡貓主梁先生，將「鴛鴦」抱回士多，貓歸原主，人貓重逢，梁先生失而復得，喜出望外，「佢依家歸還隻貓，我依家開心返，唔追究件事了。」

本網記者今（8日）下午去到梁生位於大角嘴的士多探訪重回主人身旁的「鴛鴦」。「鴛鴦」表現活潑，梁生將「鴛鴦」抱在懷內難掩喜悅。「今日凌晨1點幾，士多閂咗閘，但我仲未收工，對方打電話畀我，帶住貓籠還返「鴛鴦」畀我。」梁估計，「佢可能睇到新聞，驚俾人話佢盜竊，所以攞返隻貓過嚟。」還貓人正是cctv拍到的紮髻男。

貓主梁先生抱着「鴛鴦」喜形於色。蔡楚輝攝

梁先生說今日凌晨紮髻男將「鴛鴦」抱返他鋪頭，他笑言「我依家開心返，唔追究件事了。」蔡楚輝攝

「鴛鴦」媽媽「忌廉」終與愛女重逢。蔡楚輝攝

梁先生指平日「忌廉」及「鴛鴦」母女都放在鋪頭閣樓飼養。蔡楚輝攝

今凌晨歸還「鴛鴦」的正是cctv拍到的紮髻男。梁先生提供

「佢同我解釋話驚隻貓凍所以接走佢，本身想攞去愛護動物協會喎，佢又話自己本身有養貓，但唔係貓義工。」對方為何拿走「鴛鴦」成個星期都不還呢？梁先生引述對方說：「佢話唔得閒，諗住過幾日先拎返嚟。我話畀咗一個禮拜時間你啦，可能佢見到新聞，驚俾人話盜竊，不過唔緊要啦，始終件事解決咗就ok啦！」對於是否接受對方的解釋，梁先生笑言：「佢依家歸還隻貓，我依家開心返，唔追究件事！」他表示稍後會到警署銷案。
「鴛鴦」與主人重逢，被梁生抱在手上，動也不動，非常乖巧，不像平日周圍走，顯然覺得在主人心上是個寶，梁生說「鴛鴦」見到媽媽好開心，而媽媽對愛女失蹤一周，整日也茶飯不思，「佢冇食嘢，啲貓糧喺晒度。」

梁先生昨向本網記者表示，早前店內一歲半大的貓店長「忌廉」一胎生兩貓女，其中「鴛鴦」毛色灰白色，雌性，現時約3個月大，出世至今一直都是由他及其女友一同照顧，另一隻則給人領養了。「忌廉」及「鴛鴦」兩母女平日都會放在鋪頭的閣樓飼養。他形容「鴛鴦」非常怕陌生人，不喜歡被人抱，卻和他非常親近，一同「煲劇」及一同睡覺，甚至間中會帶牠回家生活，感情深厚。

 

貓媽「忌廉」與「鴛鴦」母女情深。

「鴛鴦 」與貓主梁先生非常親近。

「鴛鴦」非常可愛。

貓媽「忌廉」因「鴛鴦」失蹤悶悶不樂。

梁先生一度在店外張貼尋貓啟示及截圖。

 

惟上周三（11月30日）晚上收舖時，梁生未有為意，返回家才想起收舖時不見「鴛鴦」蹤影，於是折返士多看CCTV，發覺「鴛鴦收鋪嗰陣竄咗出去，之後就俾人抱走咗」。

根據梁先生提供的CCTV片段所見，當時店外有一對男女，而旁邊站有一名身穿短袖tee、紮髻的男子抱起「鴛鴦」，雙方交談一會兒後離開。梁先生指該對男女早在「鴛鴦」被抱走前半小時，已在舖外徘徊，其間又多次打電話，未幾紮髻男便到場，二話不說將「鴛鴦」抱起，整個過程僅2分鐘。

對於「鴛鴦」被偷走，梁先生感到非常傷心，連日來在社交平台發文尋貓，又在店外張貼告示及CCTV截圖，希望有心人提供線索尋回「鴛鴦」，「有個街坊同我講，話鴛鴦俾人抱走嗰時，佢曾經同個紮髻男人講過隻貓有人養，係屬於間舖頭，但嗰個人話驚隻貓凍，第二日會拎返落嚟，點知等咗咁耐一直都無消息」。

梁先生續指，CCTV拍到的該對男女事後曾於網上澄清，聲稱自己並不認識紮髻男，亦不知道對方身份，更指可以陪同梁先生到警署報警，以示清白，「嗰對男女話自己屋企養咗2隻狗喎，所以根本無可能偷走鴛鴦喎」。

自「鴛鴦」失蹤後，貓媽「忌廉」一直悶悶不樂，茶飯不思，每天開鋪後都想衝出門口尋女，看得梁生心痛不已。他待了一星期見「鴛鴦」仍下落不明，昨（7日)決定報警求助，希望早日覓得愛貓，他昨許下承諾，「其實畀返我（「鴛鴦」），我可以當無呢件事發生」。果然，對方可能看到報道後知道事態嚴重，今凌晨抱回「鴛鴦」給梁先生，梁先生亦前事不計，不再追究事件。

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ