世界盃2022｜專欄：日本比利時教練保守之過

日本隊可以好精采咁贏德國，但又可以好肉酸咁輸畀哥斯達黎加，點解呢？日本未失波前踢到「阿婆行路」咁款，對手踢得非常舒服。日本喺下半場中段換入三笘薰，結果佢有近二十分鐘無落過底綫，完全發揮唔到強項。遲遲唔換走部分腳風唔順嘅球員，落後緊仍打雙防中。呢場日本隊教練森保一嘅部署，要錯嘅都錯晒咁滯。

艾爾講過日本可以走得更遠，大前提要「一哥」保持對德國嘅高水準臨場調動。對住實力較弱嘅哥斯達黎加，部署仍係咁保守，經過呢場敗仗後，各位都係唔好再將森保一當神咁拜。

比利時輸畀摩洛哥零比二，艾爾講過比利時第一場遠離水準，用人上要有改變先有轉機。結果，今場三中堅人選無乜變過，前綫繼續用把握力極差嘅巴舒亞伊，夏薩特繼續無貢獻。結果，七十幾分鐘先換走巴舒亞伊，八十分鐘先換入盧卡古，部署上又係錯晒。奇雲迪布尼話比利時今屆無可能拎世界盃，因為球隊太老。其實，陣中大把年輕兼用波能力強嘅球員，只係馬天尼斯唔肯用。呢場敗仗證明呢班「黃金一代」，踢出嚟已經變成「黃金末代」。

日本同比利時嘅敗績，就好似玩「鋤大D」揸住「四條二」都可以輸，就係想睇定啲先而唔出住，幾靚嘅一手牌都玩到爛晒。艾爾只可以同森保一同馬天尼斯講：「祝你好運！」

B組伊朗會同美國進行生死戰。美國今場要贏先可以出綫，陣中球員有潛質但欠火候，前綫入球能力一般。今場對住重新振作兼有半個地利嘅伊朗，相信唔容易攻得入，先考慮讓球受讓「+0/0.5」下盤，再考慮半場和。艾爾

立即下載 | 全新《星島頭條》APP : https://bit.ly/3yLrgYZ