世界盃2022｜專欄：絕地反擊非球王專利

寫呢篇文嘅時候，啱啱睇完阿根廷對墨西哥嘅賽事。阿根廷首仗落敗後，今場必須取勝先可以保住出綫機會。睇住大半場雙方形勢，筆者一路以為美斯嘅探戈準備落幕，勢估唔到下半場佢喺禁區頂一支冷箭幫球隊先開紀錄，另有安素費南迪斯禁區內妙射死角助阿根廷全取三分。

同樣首仗落敗，嚟緊非勝不可嘅尚有塞爾維亞。佢哋首仗以零比二負於巴西，整場比賽受制於巴西嘅壓逼性踢法，表現只屬水準以下。

中場大腦米連高域沙域及杜辛泰迪治未能控制賽事節奏，導致今季於富咸表現出色嘅中鋒阿歷山大米祖域失去供應。但塞爾維亞其實不乏扭轉戰局之能力，其中米祖域今季已為球會射入唔少關鍵入球，而且祖雲達斯射手杜辛華荷域亦隨時候命，可為球隊進攻提供更多選擇。

佢哋眼前對手將會係輸畀瑞士之後同樣背水一戰嘅喀麥隆。喀軍於上半場連番突擊未能得手，下半場在落後下更愈踢愈沉，隊中星級戰將祖普莫亭實有孤掌難鳴之感。戰意分野之下，筆者睇高塞爾維亞半綫，嚟緊嘅對決，佢哋應可小勝而回。球樂

立即下載 | 全新《星島頭條》APP : https://bit.ly/3yLrgYZ