世界杯2022｜专栏：绝地反击非球王专利

写呢篇文嘅时候，啱啱睇完阿根廷对墨西哥嘅赛事。阿根廷首仗落败后，今场必须取胜先可以保住出綫机会。睇住大半场双方形势，笔者一路以为美斯嘅探戈准备落幕，势估唔到下半场佢喺禁区顶一支冷箭帮球队先开纪录，另有安素费南迪斯禁区内妙射死角助阿根廷全取三分。

同样首仗落败，嚟紧非胜不可嘅尚有塞尔维亚。佢哋首仗以零比二负于巴西，整场比赛受制于巴西嘅压逼性踢法，表现只属水准以下。

中场大脑米连高域沙域及杜辛泰迪治未能控制赛事节奏，导致今季于富咸表现出色嘅中锋阿历山大米祖域失去供应。但塞尔维亚其实不乏扭转战局之能力，其中米祖域今季已为球会射入唔少关键入球，而且祖云达斯射手杜辛华荷域亦随时候命，可为球队进攻提供更多选择。

佢哋眼前对手将会系输畀瑞士之后同样背水一战嘅喀麦隆。喀军于上半场连番突击未能得手，下半场在落后下更愈踢愈沉，队中星级战将祖普莫亭实有孤掌难鸣之感。战意分野之下，笔者睇高塞尔维亚半綫，嚟紧嘅对决，佢哋应可小胜而回。球乐

立即下载 | 全新《星岛头条》APP : https://bit.ly/3yLrgYZ