獨家丨直擊韓馬利鬧爆林夏薇生仔冇屎忽周嘉洛被幕後整到婉拒對方道歉

2022-11-22 08:00

TVB日前舉行下年節目巡禮，晒冷式節目介紹梗有一套啱你心水，當中最厲害27歲力捧小生周嘉洛，一人孭三套劇，計比例多過好多視帝，雖然極速上位中，但周小生無話招招積積，依舊同工作人員打成一片。日前，周小生同林夏薇喺西貢為《寵愛Pet Pet》拍外景，見佢玩鬼工作人員，唔使埋位就坐石壆髀擘擘，好似隔離屋啲哥哥咁，咁鬼親民，抵佢有運行嘅。採訪:金泰亨

介紹劇中角色，男女主角及小販韓馬利。

周嘉洛在《痞子殿下》首任主角，《痞子殿下2》成為下年重頭劇。

周嘉洛在劇中飾演寵物傳心師汪聲仁，林夏薇飾演獸醫。

周嘉洛與游嘉欣都是TVB力捧的對象。

周嘉洛及游嘉欣出席劇集《羅密歐與祝英台》拜神儀式。

周嘉洛下年被TVB委以重任，孭飛劇集計有《寵愛Pet Pet》、《羅密歐與祝英台》及《痞子殿下2》，因為形象健康又入屋，有指佢係馬國明接班人，咁佢精靈過馬明嘅，希望佢唔會好似馬生咁要等咁多年先拎視帝啦。

韓馬利鬧到成條街都聽到
講返探班，當日星期日，陽光普照仲幾熱添，周嘉洛、林夏薇、韓馬利及楊證華在舊墟附近拍外景，劇情講述小販韓馬利疑似呃錢，周嘉洛同林夏薇去理論，但換來喝罵，「你兩個蝦一個，生仔冇屎忽㗎。」男方疑似想息事寧人被林夏薇叫停，稱唔可以助長騙徒，韓馬利即刻爆Seed，「你夠膽講多次?」記者都嚇一嚇，然後楊證樺現身做正義嘅事，指證對方呃人又阻街，仲話報警添。

韓馬利好惡咁兇周嘉樂同林夏薇。

楊證樺現身加入指證小販呃人。

當日街坊話楊證樺好熟口面。

等ROLL機時林夏薇玩公仔。

因為演員表現好，兩take收貨，然後再等拍另一場口。等候期間，周嘉洛同林夏薇都幾好傾，又互相推吓，仲幫手執好地攤啲公仔。有工作人員掉沙包落地，因為掉正周嘉洛身邊所以講咗句Sorry，換嚟周嘉洛講笑式無情應對，「傻啦，你乜都冇做到已經講Sorry喇，我嬲你㗎。」之後仲好隨意咁坐喺石壆等埋位，性格相當OK喎。