獨家丨蘇皓兒鍾意男仔夠Man帶睇靚景會加分栢天男用怪招𠱁女仔包笑

2022-11-20 07:00

蘇皓兒（Chloe）和栢天男（Adam）在剛上映電影《忽然心動》中首度合作，戲中 Chloe飾演未拍過拖的富家女，於是搵來演出租男友的Adam實習，結果由練習變了動真情。兩人大讚戲中場景好浪漫，首日拍攝便齊齊睇日落，而Adam戲中會英雄救美為 Chloe擋槍，不過 Chloe竟然唔多欣賞。採訪：杜杜

Chloe戲中飾演未試過拍拖的富家千金。

戲中做出租男友的Adam，呢個外形應該好好生意。

Adam和Chloe外形確實好合襯，演一對好易令觀眾投入。

兩人首度合作，Adam即賣口乖讚Chloe，「睇佢唱歌同表演好耐，一直都有留意佢，好期待同佢合作，因為覺得佢好sweet，係好合眼緣嘅演員，今次合作都覺得好有火花。」不過Chloe講到兩人初次見面已經要扮到好熟，諗起都覺得尷尬，「我哋第一次合作，仲要第一次見就係第一日開工，嗰日就要拍ending嘅戲份，我哋中間經歷嘅嘢全部都未拍。」Adam都認同難搞，「導演真係好睇得起我哋呀！」

Adam和Chloe雖然第一次合作，但好快便熟絡。

Adam性格鬼馬，𠱁到Chloe不停笑。

開工睇住日落食飯

好彩當日在沙灘拍攝，靚場景令兩人好快投入浪漫氣氛。Chloe說：「好romantic好正，我哋食飯嗰時仲要對住個日落㗎！」Adam笑着補充，「我嗰時捉到佢一個人影緊個天，我仲問佢點解得一個人，係咪有咩唔開心呀？點知佢話睇吓個日落幾靚。」Chloe承認男仔帶睇靚景會加分，「睇吓日落、日出，睇吓星空都幾浪漫，帶我去啲大自然環境就得，唔使錢都會冧。」Adam即刻認叻：「咦！我嗰日都做咗喎！」Chloe即沒好氣：「但係我哋嗰日唔係你帶我睇，係你咁啱喺我隔離咋，哈哈！」Adam都試過情人節帶女朋友去睇星星，不過講到至叻冧女招數？他答得好風騷：「唱歌囉！Chloe你冇聽過我唱歌？我唱得好難聽，咁咪𠱁到佢笑囉！我鍾意搞笑令對方開心。」

估不到戲裏戲外，兩人都有機會一齊睇日落咁浪漫。

Adam擋槍Chloe唔領情

講到另一場難忘戲份，Adam首推man到爆為Chloe擋槍一幕，點知戲裏戲外都要中槍，「嗰日有個神槍手嘅師傅嚟咗，我為咗英雄救美，咪叫佢用我嚟試槍囉！點知佢射中咗我盔甲之間個空位，真係痛到入骨呀！」此時Chloe才知真相，Adam即搞笑表示：「我為你擋咗好多槍，你唔知呢？以為真係戲嚟呀？」講到有男仔擋槍會否好感動？Chloe就唔多領情，「我會覺得佢傻囉！唔識避嘅，拉我走啦，仲喺度畀人射，一係就射返對方先得，我都係鍾意男仔man啲，咁佢喺戲入面都好man嘅。」