張敬軒驚喜現身洪嘉豪演唱會 自豪撐場：我支嘢晚晚陪住你
2022-11-14 19:50 
洪嘉豪(Kaho)演唱會上周日晚（13日）圓滿結束，張敬軒現身做尾場嘉賓，二人合唱《騷靈情歌》，令觀眾興奮萬分。
【相關閱讀】：洪嘉豪首場處男個唱張家輝驚喜「現身」 罕有現場騷肌報答粉絲
【點擊睇洪嘉豪演唱會尾場靚相】：
當晚《騷靈情歌》音樂響起，軒公未出場，觀眾已經興奮狂叫，Kaho笑道：「咁快知，咁一陣叫大聲啲」。然後唱起《騷靈情歌》，軒公出場當然就震憾全場，唱畢兩人相擁，Kaho坦言，其實一見他身影於舞台上出現已經想喊，不過《騷靈情歌》不簡單，不想唱不好失禮，所以唯有一直死忍。Kaho話：「我第一個騷好想同好重要嘅人分享第一次，軒哥，我識你20年，我點會估到有呢一日，可以請你做嘉賓，仲要攞住你支咪喎。」軒哥非常搞笑回答：「好開心我支嘢可以晚晚陪住你……哈哈哈！我啱啱同Kaho拍咗兩個月戲，佢平日喺劇組串串貢，今日做咩咁謙虛，我哋《超神經械劫案》Jeffrey（魏浚笙）、白只，仲有好多人，今晚幾乎成個劇組嚟晒撐你，勁呀你。」Kaho：「唔係呀，我邊有串，係白只佢哋搞到我咁，哈哈。」
軒公說：「其實Kaho對我來講，真係親生細佬咁，我識佢嗰陣佢毛都未有……哈哈，唔係，係中學都未讀，仲讀緊小學。每次講開Kaho，喺佢媽咪眼中口中呢個仔都係洪家驕傲，鋼琴又叻，有天份，之後佢讀演藝，你問我，我喺Kaho音樂事業上面，冇幫佢太多，今日佢企到喺台上，真係全靠佢努力同大家支持。你睇今晚直情好似去咗韓國睇音樂會咁，好靚！」Kaho聞言即說：「我想同你講，上次你送支咪畀我，希望我可以喺自己個台唱歌，我做到啦，多謝你。軒哥，下次！我紅館再請你！」獲全場狂熱歡呼！軒哥見Kaho咁有志氣，即再來一個大力擁抱。當晚好友MC（張天賦）、AK、肥仔梁業、jeffrey（魏浚笙）、白只、蘇麗珊、陳凱詠等亦有到場支持。
【其他閱讀】：
神之拉闊丨Anson Lo少咗阿Mo伴舞後首登台 日前疑為兄弟落淚回復心情勁舞開唱
神之拉闊丨盧瀚霆演出中段胃抽筋 病情轉好凌晨IG報平安承諾會好好休息
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應