Juicy叮｜極品女友手袋竟放滿用過紙巾 港男憂「點一齊結婚生活？」

每個人的生活習慣各有不同，但如果因為結婚而需要一同生活，便需互相遷就。有港男日前在網上發文指，女友的衛生習慣甚差，包括習慣將使用過的紙巾放在手袋內，並指「有時問佢借紙巾，佢仲會畀呢啲用過嘅紙巾畀我用」，令他擔心「如何之後同佢一齊結婚生活」。

該名網民早前在香港討論區以「女朋友好污糟，唔知以後點同佢生活好」為題發文，指女朋友的衛生習慣差，房間長期污糟邋遢，並會將穿過與未穿過的衣物堆在一起，部分衣服甚至會直接扔在地上。樓主憶述，有一次曾使用女友的電腦，並發現整個熒幕滿布灰塵，當他用濕紙巾清潔時，濕紙巾即變成黃色，「都唔知佢幾耐冇抹過部電腦，部電腦佢仲要日日用，都唔明佢係點忍受用一部污糟嘅電腦」。

樓主又指，女友的另一個習慣是將使用過的紙巾放在手袋內，不會立即扔掉，因此每次打開女友的手袋時，亦會在袋中看到大量「垃圾紙巾」。他又指，間中向女友借紙巾時，對方更會將自己使用過的紙巾給他，並指「但咁污糟點用噃，都唔知佢呢啲係慳家定污糟」。他擔心「如何之後同佢一齊結婚生活，我一定要成日執屋啦。」

港男指，女友的衛生習慣甚差，習慣將使用過的紙巾放在手袋內。iStock圖片

相關帖文隨即引起熱議，有人直言「服咗你，咁都頂得」、「好恐怖......呢家都咁，結咗緍你死硬」、「女友冇所謂啦，老婆就唔好囉」、「分手，唔係就後悔」、「結婚咗你會仲難受，衫亂都算，屋企啲嘢亂放，有平面嘅嘢就會亂葬崗咁。食完嘢放晒喺台，外賣食完幾日都唔掉，碗唔洗，地唔拖，廚房廁所更加唔會清潔....我老婆就係咁」。有人則建議，「每人一間房… 解決！佢間房你唔好理」、「同女友商量下改變」、「請個賓妹就解決啦」、「咁你要試下同居之後先再決定結唔結婚好啲喎」等。

另有網民則分享指，「我公司都有件咁嘅極品，唔通佢係你女朋友？沖嘢飲嘅包裝袋唔知點解永遠唔會放入垃圾筒， 明明垃圾筒只係距離一米，而且係佢自己專用垃圾筒，佢鍾意可以搬位，但佢就係要丟喺張枱仔上面，仲儲埋一堆一個山仔咁~用完嘅紙巾都一樣隨處丟，就係唔丟入垃圾筒，又係同一句，明明垃圾筒喺隔離~佢枱底同樣塞滿垃圾，電話/電腦/枱面/地下拖板都係好多污漬」。

帖文來源：香港討論區

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgY