古天后日誌｜港股未有見底訊號宜忍手

9月28日，大致多雲，有幾陣驟雨，日間短暫時間有陽光。美股隔晚早段反彈，可惜道指早段升近400點後，又有聯儲局官員出嚟放鷹，美股轉升為跌，道指收市再跌125點；標指跌7點，納指則見後抽，微升26點，但11000點反彈阻力未能收復。暫時標指跟納指喺支持位爭持，道指則再穿底，雖然美股已出現超賣，反彈亦係正常，但都敵不住沉重沽壓，兩日都係彈散格局，人人都等彈高沽。10年債息逼近4%，高見3.99%，幸而今次科技股沽壓有所收歛，部份龍頭重磅股死守，但唔排除係托住出貨，若然連呢批龍頭股都失守，美股或迎來終極一跌。10年債息升至接近4%水平，債市吸引力已高過股市，高盛跟Black Rock建議減持發達市場股票，因為呢啲股市嘅估值相對唔平。

噚日有外媒路透社爆料，指中證監發出指導，表示喺二十大前要保持股市穩定，唔准基金沽貨，呢個消息引發資金入場，A股噚日三大指數均見上升，不過深滬兩市成交只有6662億元，即係無新資金流入，只係塘水滾塘魚，無乜睇頭。

港股疲弱未改，沒有最差，只有更差，連日跟隨美股向下，雖然午後一度跟隨日A股向上，恒指收復失地但僅升5點，叫做守住17800水平，但成交額只有975億元，完全無任何見底訊號，擺明港股已成為棄嬰。金管局再接港元沽盤，夜期隨美股插水，ADR跟夜期均插水至17600水平，睇嚟今日又係仆直。

騰訊(00700)為對抗南非大股東，日日都拎3億出嚟回購，可惜仍不敵大股東沽貨嘅力量。不過騰訊跌穿300元後，大股東減持速度有所收歛，可惜騰訊未見有力量反彈，睇怕係市場擔心南非大股東一日沽盤未完，喺心理陰影下，點會有人想出手接貨，至怕係其他基金踩多腳，沽埋一份，咁真係唔得佢死。至於分段買貨嘅問題，喺美股未見終極一插，港股未出見底訊號前，都係繼續忍忍手。