「亞視一姐」阿儀官非累死姚琰欣狂申冤 黃榕匿埋兩日終認衰道歉

本周一，38歲「亞視一姐」薛影儀（阿儀）再惹官非，涉嫌「駕駛時沒有駕駛執照」、「駕駛未獲發牌照車輛」、「沒有第三者保險而使用車輛」及「駕駛電單車時沒有戴上認可防護頭盔」被捕，已獲准港幣5,000元保釋候查，於10月上旬向警方報到。

阿儀、Bonnie及黃榕當日一齊出席活動。

當日《星島頭條》已獨家披露阿儀為撐老友黃榕，未有知會亞視私下答應出席活動。事件曝光後，有指拍片者是同場的亞姐姚琰欣(Bonnie)，之後對方已急急在社交平台出Po澄清：「活動唔係我帶佢去，段片唔係我拍，把聲唔係我嚟，大家唔使再Send畀我！唔係我！」

Bonnie澄清完都冇用。

不過，就算點澄清都被網民鬧無腦，Bonnie覺得好慘，主動聯絡《星島頭條》記者申冤，因為好多人以為段片由佢拍攝，又指黃榕唔出嚟同人交代清楚，「好多人不停send嚟問我搞到我好煩擾，睇到啲新聞覺得自己好冤枉比人屈，好唔開心，已經連續兩晚都瞓唔到，嘢又食唔落。我男朋友見到我咁好擔心好登（戥）我唔抵，自己女朋友比人屈，覺得比人推咗我出嚟自己面對咁，但明明就唔關我事。」

問到會否怕影響之後接Job，佢都好擔心，「都擔心，因為呢啲係好低級錯誤，都擔心同亞視關係，因為始終呀儀係亞視藝人，我都係選亞姐認識呀儀，咁樣比人屈以為我私下帶呀儀出席活動唔同公司講，其實都好嚴重，其實之前我都有啲廣告商朋友想我介紹邀請呀儀工作，我都係比Connie（阿儀經理人林寶玉）嘅電話佢哋自己傾，唔會背住亞視幫呀儀接工作。」

對於始作俑者黃榕，Bonnie希望佢快啲出嚟交代清楚，「因為其實我澄清完，睇到啲網民留言都估到係邊個。」

Bonnie以短訊表示，事件令佢情緒受困擾，瞓唔安食唔落。

話口未完，今日下午三時，熄電話兩日嘅黃榕終於蒲頭道歉，「本人黃榕Gloria 2022年8月13日出席的I wanna fly 2022電單車活動，本人是邀請阿儀以朋友身份來玩，她當天不是以嘉賓工作身份來出席活動，這次事件令阿儀，亞視公司以及其他任何在這活動事件上的藝人帶來所有不便，我在此深感抱歉，事件已經交由律師處理當中，我不方便再回應。」
 

黃榕知道避唔到終於要上水。

TEXT:SW

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ