58歲呂方被2歲囡囡融化 湊女冧到爆又攬又錫係咁笑

前年，58歲的呂方做咗高齡老竇，太太伍惠寶（Rainbow）誕下Emma，由於身家豐厚，又家住元朗獨立屋，呂方去年尾參加完內地節目《我們的歌》後基本上可以退休，全職湊女。

一家三口仲着晒親子裝添。

伸晒脷咁餵囡囡食雪糕。

因為老來得女，呂方自然錫女錫到燶。呂太放咗段新片到IG，片中嘅2歲囡囡喺屋企搵老竇，見小妹妹慢慢上樓梯，上到第二層，爸爸就出房門口迎接佢，睇呂方個笑樣，隔住個Mon都Feel到有幾甜。一開始，呂方張開雙手攬囡囡，然後Emma拖住老竇落樓，老竇見攰坐低，同囡囡一齊拍打大髀，去到轉彎位，老竇就狂攬囡囡，又同囡囡面貼面，Emma好活潑，錫完爸爸面再錫嘴嘴，氹到呂方咭咭笑。

另外，呂太不時分享湊女之日常，最新有帶囡囡去打第一針疫苗，仲狂讚打針過程冇得彈，因為政府網站預約好容易喎。「 今日星期日，人會比較少啲， 由泊低架車 （車位就真係太少）， 每一個位置都有人帶領住我哋， 完全唔需要等，好輕鬆就帶到Emma坐低打針。原本我都有啲擔心， 驚控制唔到小朋友會扭計， 點知沿途啲卡通氣氛＋貼紙， 令佢完全意會唔到有哥哥即將要拮佢針🙈 最令人驚嘆嘅係護士哥哥一邊同佢傾計， 0.1秒之際就拮咗支針落去大髀，Emma 望一望自己隻大脾， 竟然好似若無其事咁繼續玩張貼紙😂😂😂 我同工人姐姐O曬嘴 （互相對望）， 欣然行去等候區。 驚喜陸續有嚟， 等候區有個扭波姐姐送每人一個扭扭波， Emma 歡喜若狂， 好大可能佢好想快啲再嚟打第二針。」呂太仲話Emma好叻 ，因為打完之後完全冇唔舒服，唔知以為廣告添呀。

囡囡打第一支疫苗。

收到波波好興奮。

小朋友真係好易滿足。

另外呂太仲有分享囡囡同狗仔玩嘅片，又有可愛瞓覺樣同去公園玩嘅相，最過癮係杜德偉帶囝囝AJ去探37年老友呂方，5歲AJ輕攬2歲Emma影合照，好似迷你版杜德偉跟Mini版呂方咁，好鬼得意呀。 

囡囡同媽媽養嘅狗狗好好感情。

一齊喺後花園玩。

有時間就出去唞吓氣。

老竇視角。

呂太好鍾意影囡囡瞓覺。

杜德偉帶囝囝去探呂方，兩家人嘅小朋友影合照，好似迷你版杜德偉跟Mini版呂方。

 

TEXT:SW

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ