獨家丨鄧達智激讚泰國比美國安全100倍剛獨遊泰緬玩得開心10月再去

2022-08-26 06:58

近日東南亞「賣豬仔」事件愈揭愈多，唔少受害人都現身說法，指到埗後隨即被禁錮，更被迫從事電騙，亦有受害港人求助時報稱，喺泰北旅遊時不幸被綁架至緬甸。不過，8月18日才由泰國曼谷旅遊返港嘅鄧達智(William)未驚過，更試過隻身到緬甸邊境遊覽，深夜大雨時持傘於偏僻地方散步，他坦言：「世界各地都危險，唔貪心就冇事。」更強調泰國係友善之都，打算10月再去過！採訪：方騫平

William獨自喺唐人老區散步，感受一吓舊區古老味，而活化後的老區增加唔少文青氣息。

鄧達智喺唐人老區獨自穿過老街小巷。

7月泰國開關，William鏡頭下影到西方遊客已陸續重返泰國。

受疫情影響，鄧達智對上一次旅行已是2020年農曆年，跟伴侶陳醫生(Clement)去尼泊爾，直至7月泰國開關，放寬隔離政策，William急不及待，單拖起行：「陳醫生要應診行唔開，但我有好多朋友喺曼谷，原先預算兩周行程會落埋檳城，到最後都因為唔夠時間，只能停留泰國。」

2020年農曆年，William跟伴侶陳醫生去完尼泊爾後未有出過門。

朋友狂問候搲晒頭

此行William除咗到唐人老區散步，感受一吓舊區被活化後嘅古老味外；更離開曼谷，去到近緬甸邊境嘅一個種植稻米水鄉Nakhon Pathom，「我一個人穿梭橫街窄巷，深夜冒雨喺偏僻地帶散步，影吓水鄉夕陽，真係好寫意。」

單拖遊覽緬甸邊境Nakhon Pathom嘅水鄉河邊。

William捕捉水田中嘅白鷺，悠然自得。

觀賞水鄉夕陽，十分寫意。

William唔鍾意被打擾，一個人遊走曼谷外圍嘅偏僻地區。

直到行程尾聲，William不停接獲朋友問候短訊，搞到他一頭霧水：「當時我都唔知(朋友)講緊乜，仲以為佢哋講緊疫情，所以回覆話『我冇事！』直至返港先知原來咁大件事。」至今William依然冇擔心過人生安全問題，還自嘲說：「哈！好彩我係老臘肉唔係小鮮肉！又唔使搵份十萬八萬月薪嘅荷官啫。」

鄧達智有好多朋友喺曼谷，包括中國菜館主持人文偉賢師傅。

5年前已在曼谷置業

就算泰國被指淪為人口販賣中轉站，仍無減William對當地嘅熱愛程度：「𠵱家嘅曼谷係大城市，下一個國際大都會，當地人好Nice呀，氣氛好好，5年前我經已喺市中心Siam Area買咗樓。呢度我感覺好安全，起碼比去美國哈林、底特律、曼哈頓、三藩市，甚至巴黎、倫敦、西班牙安全100倍！好似我朋友放底啲嘢喺曼谷嘅coffee shop兩個小時，物件可以原封不動。」

深夜大雨滂沱，持傘於偏僻地方散步。

深夜雨中行，邊行邊影吓相。

William 5年前喺曼谷大學區用200萬港元置業，單位面積近500呎。

常周遊列國，對中西社會都有深入了解嘅William分析說：「唔好以為西方國家就係好，美國係世上販賣人口第一大國，歐洲劫持未成年少男少女，用毒品操縱，賣淫、搶劫、偷竊⋯⋯無日無之，世界各地都危險，好多事發生係由貪念及唔小心開始，當然發生呢啲唔係好事，睇返CCTV都覺得好恐怖，犯罪份子行為連禽獸不如。」William唔怕力撐泰國嘅言論會惹嚟熱話及Hater，他立場堅定表示：「點會怕？我講我自己嘅取態，冇鼓勵人哋認同！」William形容今次玩得好開心，唔夠喉，打算今年10月再Encore：「我真係唔會驚㗎，之前我一個人去伊朗、也門、坦桑尼亞旅行都係咁啦，陳醫生都去打仗中嘅南蘇丹、斯里蘭卡、伊拉克做過無國界醫生，咁仲有乜好驚？」