独家丨邓达智激赞泰国比美国安全100倍刚独游泰缅玩得开心10月再去

2022-08-26 06:58

近日东南亚「卖猪仔」事件愈揭愈多，唔少受害人都现身说法，指到埗后随即被禁锢，更被迫从事电骗，亦有受害港人求助时报称，喺泰北旅游时不幸被绑架至缅甸。不过，8月18日才由泰国曼谷旅游返港嘅邓达智(William)未惊过，更试过只身到缅甸边境游览，深夜大雨时持伞于偏僻地方散步，他坦言：「世界各地都危险，唔贪心就冇事。」更强调泰国系友善之都，打算10月再去过！采访：方骞平

William独自喺唐人老区散步，感受一吓旧区古老味，而活化后的老区增加唔少文青气息。

邓达智喺唐人老区独自穿过老街小巷。

7月泰国开关，William镜头下影到西方游客已陆续重返泰国。

受疫情影响，邓达智对上一次旅行已是2020年农历年，跟伴侣陈医生(Clement)去尼泊尔，直至7月泰国开关，放宽隔离政策，William急不及待，单拖起行：「陈医生要应诊行唔开，但我有好多朋友喺曼谷，原先预算两周行程会落埋槟城，到最后都因为唔够时间，只能停留泰国。」

2020年农历年，William跟伴侣陈医生去完尼泊尔后未有出过门。

朋友狂问候搲晒头

此行William除咗到唐人老区散步，感受一吓旧区被活化后嘅古老味外；更离开曼谷，去到近缅甸边境嘅一个种植稻米水乡Nakhon Pathom，「我一个人穿梭横街窄巷，深夜冒雨喺偏僻地带散步，影吓水乡夕阳，真系好写意。」

单拖游览缅甸边境Nakhon Pathom嘅水乡河边。

William捕捉水田中嘅白鹭，悠然自得。

观赏水乡夕阳，十分写意。

William唔锺意被打扰，一个人游走曼谷外围嘅偏僻地区。

直到行程尾声，William不停接获朋友问候短讯，搞到他一头雾水：「当时我都唔知(朋友)讲紧乜，仲以为佢哋讲紧疫情，所以回覆话『我冇事！』直至返港先知原来咁大件事。」至今William依然冇担心过人生安全问题，还自嘲说：「哈！好彩我系老腊肉唔系小鲜肉！又唔使搵份十万八万月薪嘅荷官啫。」

邓达智有好多朋友喺曼谷，包括中国菜馆主持人文伟贤师傅。

5年前已在曼谷置业

就算泰国被指沦为人口贩卖中转站，仍无减William对当地嘅热爱程度：「𠵱家嘅曼谷系大城市，下一个国际大都会，当地人好Nice呀，气氛好好，5年前我经已喺市中心Siam Area买咗楼。呢度我感觉好安全，起码比去美国哈林、底特律、曼哈顿、三藩市，甚至巴黎、伦敦、西班牙安全100倍！好似我朋友放底啲嘢喺曼谷嘅coffee shop两个小时，物件可以原封不动。」

深夜大雨滂沱，持伞于偏僻地方散步。

深夜雨中行，边行边影吓相。

William 5年前喺曼谷大学区用200万港元置业，单位面积近500尺。

常周游列国，对中西社会都有深入了解嘅William分析说：「唔好以为西方国家就系好，美国系世上贩卖人口第一大国，欧洲劫持未成年少男少女，用毒品操纵，卖淫、抢劫、偷窃⋯⋯无日无之，世界各地都危险，好多事发生系由贪念及唔小心开始，当然发生呢啲唔系好事，睇返CCTV都觉得好恐怖，犯罪份子行为连禽兽不如。」William唔怕力撑泰国嘅言论会惹嚟热话及Hater，他立场坚定表示：「点会怕？我讲我自己嘅取态，冇鼓励人哋认同！」William形容今次玩得好开心，唔够喉，打算今年10月再Encore：「我真系唔会惊㗎，之前我一个人去伊朗、也门、坦桑尼亚旅行都系咁啦，陈医生都去打仗中嘅南苏丹、斯里兰卡、伊拉克做过无国界医生，咁仲有乜好惊？」