最後禮物丨黃子華謝幕宣佈加開10場 坦認體力用到盡不能再加
2022-08-24 17:30 
黃子華和潘燦良主演的舞台劇《最後禮物》，昨晚（23日）來到第25場，當演出完畢後子華突然驚喜宣佈決定加開10場，門票將在本周五（26日）早上10時於快達票網站公開發售。 昨晚演出過後，子華和潘燦良帶領一眾演員謝幕，接受觀眾歡呼及掌聲時，子華表示，「有個特別消息公佈！其實都唔係好關你哋事，呢個消息係我哋會加開10場！」觀眾聞言即歡呼聲再四起，子華續說：「如果你哋今晚睇完之後，有少少不滿意，你等我哋星期五加咗場賣晒飛，你先好去同人講你嘅不滿。但如果你真係不滿，我要恭喜你，因為你個家庭一定好幸福。咁重有朋友想睇，你哋就幫我話聲佢哋聽……」，語畢又令觀眾隨即拍爛手掌，笑聲滿場。
至於潘燦良對於觀眾熱情支持，表示十分感謝，他在台上表示：「香港仲有好多好嘅演出等緊大家去支持，係我哋同期，或者跟住後面重有好多唔同題材又精采嘅舞台劇，大家可以去睇埋，嚟緊中秋節，香港人要支持香港電影！」觀眾即又歡呼聲四起，大叫即將在中秋節上映、子華主演的電影《飯氣攻心》，子華見好拍檔為他宣傳電影，他也即時回禮：「嚟緊有個舞台劇叫《短暫的婚姻》，係潘燦良導演，大家記得支持。」又即時引來掌聲雷動。
之後子華及潘燦良異口同聲表示沒想到眨眼已經演出了25場，比想中過得更快，潘燦良坦言身體有一點累，子華則笑謂：「佢真fit過我，我就攰到每日都虛脫一樣。」這次《最後禮物》口碑載道，侚眾要求再加10場，創下疫情中最多場數舞台劇紀錄，但仍有很多觀眾買不到門票，外間要求加多廿場都嫌未夠，子華聞言坦言：「唔好再加啦！10場夠，原則上我想做埋聽日就休息添呀。但係知道真係好多人想睇到一個咁好嘅制作，咁好嘅表演.....加上我發現好多人睇完之後，個劇帶俾佢地好多反思，對佢哋有一個『好』的影響，有睇過都知，我哋個劇係講家庭，所以我先搏埋條命做多10場。我哋係孫悟空就好啦，可以做幾百場，但係50場對我嚟來講，真係盡啦。」
立即下載 | 全新《星島頭條》APP : https://bit.ly/3yLrgYZ
最新回應