獨家｜胡慧冲擔心失聯求助者生死身處泰國有危險大叫「吹堆」求救

2022-08-22 06:00

本港近日揭發有多名港人被「賣豬仔」到柬埔寨等東南亞國家嘅恐怖案件，期間遭禁錮從事網騙工作、虐待及勒索。曾主持多個泰國旅遊節目嘅「泰國通」胡慧冲（Roger）接受《星島頭條》獨家訪問時，聲稱之前向他求救嘅受害者再冇跟他聯絡，他亦冇收到最新嘅求助個案，他說：「就算有，都畀返港府處理返，始終我係個普通人，好多嘢都控制唔到。」不過，對於與求助人失聯，他都擔心對方嘅安全狀況：「梗擔心啦，人命嚟㗎嘛，如果真係好似傳聞中咁講，被發現向外求助嘅，會被重罰咁點算呢？」

胡慧冲接受《星島頭條》獨家訪問時，聲稱之前向他求救嘅受害者再冇跟他聯絡。

胡慧冲係「泰國通」，經常穿梭大街小巷介紹美食。

冇資格講去唔去泰國

有組織罪案及三合會調查科高級警司何振東截至昨午（21日）前指，接獲的「賣豬仔」求助個案增至36宗，當中包括32男4女，年齡介乎19至57歲，其中14人人身安全且自由，11人已回港，3人按意願暫未回港，究竟𠵱家好唔好去泰國旅行？Roger就審慎咁講：「其實我只係個普通人，根本冇資格同大家講，去定唔去，我覺得大家可考慮自己嘅情況，畢竟人人唔同。」他唯一要提醒，呢個世界上都有好人同壞人：「最重要便宜莫貪，千祈咪亂去。若去泰國唔好去冷門嘅地方，大家應留意返港府嘅旅遊警告。」

Roger提醒大家千祈唔好亂去泰國嘅冷門地方。

胡慧冲曾經同好好身材嘅冬陰妹拍泰國旅遊節目。

到訪要注意自身安全

Roger承認極度關注「賣豬仔」事件，亦曾跟幾個泰國朋友傾開，留意當局救人新聞，希望受害者盡快獲救。他更呼籲大家就算到訪泰國都要注意自身安全，少去夜街：「人在外地好多樣嘢都要小心，有人叫你去私竇嗰啲就算唔關人口販賣，都會有存在性危險，亦唔好去偏僻嘅地方，唔好炫耀戴晒金錶金鏈。」

去到邊都要注意人生安全，最重要便宜莫貪。

大家上車後要影返低車牌，send畀朋友以策安全。

提供遊泰國安全tips

Roger並提供安全tips：「泰國冇Uber，我哋係用Grab。大家上車後要影返低司機number，send畀朋友，叫佢哋隔15或者20分鐘後搵你，以確保安全。如果有事發生，泰國可以打一個tourist police（旅客警察熱線，可以講英文）電話係1155，（香港入境處求助熱線）電話係852 1868；最後要學識叫救命嘅泰文『吹堆』，必要時喺人多嘅地方求救。」