独家｜胡慧冲担心失联求助者生死身处泰国有危险大叫「吹堆」求救

2022-08-22 06:00

本港近日揭发有多名港人被「卖猪仔」到柬埔寨等东南亚国家嘅恐怖案件，期间遭禁锢从事网骗工作、虐待及勒索。曾主持多个泰国旅游节目嘅「泰国通」胡慧冲（Roger）接受《星岛头条》独家访问时，声称之前向他求救嘅受害者再冇跟他联络，他亦冇收到最新嘅求助个案，他说：「就算有，都畀返港府处理返，始终我系个普通人，好多嘢都控制唔到。」不过，对于与求助人失联，他都担心对方嘅安全状况：「梗担心啦，人命嚟㗎嘛，如果真系好似传闻中咁讲，被发现向外求助嘅，会被重罚咁点算呢？」

胡慧冲接受《星岛头条》独家访问时，声称之前向他求救嘅受害者再冇跟他联络。

胡慧冲系「泰国通」，经常穿梭大街小巷介绍美食。

冇资格讲去唔去泰国

有组织罪案及三合会调查科高级警司何振东截至昨午（21日）前指，接获的「卖猪仔」求助个案增至36宗，当中包括32男4女，年龄介乎19至57岁，其中14人人身安全且自由，11人已回港，3人按意愿暂未回港，究竟𠵱家好唔好去泰国旅行？Roger就审慎咁讲：「其实我只系个普通人，根本冇资格同大家讲，去定唔去，我觉得大家可考虑自己嘅情况，毕竟人人唔同。」他唯一要提醒，呢个世界上都有好人同坏人：「最重要便宜莫贪，千祈咪乱去。若去泰国唔好去冷门嘅地方，大家应留意返港府嘅旅游警告。」

Roger提醒大家千祈唔好乱去泰国嘅冷门地方。

胡慧冲曾经同好好身材嘅冬阴妹拍泰国旅游节目。

到访要注意自身安全

Roger承认极度关注「卖猪仔」事件，亦曾跟几个泰国朋友倾开，留意当局救人新闻，希望受害者尽快获救。他更呼吁大家就算到访泰国都要注意自身安全，少去夜街：「人在外地好多样嘢都要小心，有人叫你去私窦嗰啲就算唔关人口贩卖，都会有存在性危险，亦唔好去偏僻嘅地方，唔好炫耀戴晒金表金链。」

去到边都要注意人生安全，最重要便宜莫贪。

大家上车后要影返低车牌，send畀朋友以策安全。

提供游泰国安全tips

Roger并提供安全tips：「泰国冇Uber，我哋系用Grab。大家上车后要影返低司机number，send畀朋友，叫佢哋隔15或者20分钟后搵你，以确保安全。如果有事发生，泰国可以打一个tourist police（旅客警察热线，可以讲英文）电话系1155，（香港入境处求助热线）电话系852 1868；最后要学识叫救命嘅泰文『吹堆』，必要时喺人多嘅地方求救。」