獨家丨ToNick恆仔箍實小花海旁調情酒店享受二人世界

2022-08-12 08:00

首先恭喜ToNick主音趙善恆（恆仔），不久前憑《一秒拳王》電影主題曲《時間的初衷》拎到金像獎嘅「最佳原創電影歌曲獎」。日前嘅周六，恆仔同女友譚杏藍(小花)現身西貢，因為女方件衫同襪都係橙色，咁鬼掁眼自然望多兩眼，原來係佢哋，之前睇小花訪問，佢話兩人拍拖十年都有好多嘢講，記者跟住佢哋行咗一陣，果然冇吹水。採訪:金泰亨

恭喜恆仔。

小花之前接受電台訪問，透露自己因為欣賞恆仔才華所以力追，話咁快十年。兩人好享受拍拖未有結婚計劃，問到相處之道，小花就咁講:「首先互相尊重好緊要，到今時今日，我就算只係見一見佢都會有心動感覺。」

爽到爆炸Staycation
當日，一身橙嘅小花同令佢心動嘅恆仔現身西貢，兩人漫無目的喺海旁行街，雖然係情侶，但兩人冇拖手，突然間恆仔箍實小花條頸行咗一陣，見兩人得個行字，偶然望吓碼頭邊嘅海鮮船仔，行咗無耐就返轉頭行返入市中心。事後睇小花IG，終於明確知道兩人當日行程，兩人去咗食意粉做Lunch，跟住喺西貢市行街影吓貓，然後就去咗白沙灣嘅酒店Staycation，第二日又去游水同做SPA，做之前仲上咗酒店頂樓嘅酒吧歎香檳，節目好豐富。