獨家丨英皇新人黃明德見到張敬軒變鵪鶉 Busking遇路人批評：佢好花心機去鬧我

2022-08-10 10:00

近年音樂圈後浪強勁，其實都多得有不同的選秀節目發掘新人，除了主流電視台舉辦的《聲夢傳奇》及《全民造星》等，其實唱片公司都好積極搞比賽，就好似多年前由電視台與唱片公司合辦的「新秀歌唱大賽」（後期改名為「全球華人新秀歌唱大賽」），圈中不少紅星都是由此起步，如：梅艷芳、黎明、許志安、蘇永康、陳奕迅、楊千嬅等等，為樂壇注入新血。英皇近年為迎合時代轉變，連「新秀」都轉型變真人騷節目《冤枉新秀訓練營》在網上播出，今年更發掘了多位有潛質新人,，其中入到最後5強、下周就踏入19歲的黃明德（Dark）就憑好歌喉得到英皇賞識正式出道。撰文：Phoebe 採訪：杜杜攝影：娛樂組

黃明德早前參加英皇搞的真人騷節目《冤枉新秀訓練營》後成功出道。

Dark最近已先後推出了2首單曲《留班同學》及《沒有穿校服的日子》，講返當初參加比賽機會，原來他是被選中的幸運兒，「我平時都有Post好多唱歌Cover片上網，因為以前我做開Busking，機緣巧合下英皇搞咗個真人騷《冤枉新秀訓練營》，佢哋搵咗我參加踢館組，好好彩去到決賽最後5強。」由於比賽有網民投票成份，Dark觀眾緣加實力都唔錯，計算投票票數更打入3甲。

黃明德（左）觀眾緣及實力都唔錯，計投票票數入到3甲。

單曲《留班同學》是黃明德的個人經歷，因為他於中一、中二兩度留班，而現時他仍是一名中學生。

面對張敬軒唔敢講嘢
由於是次比賽於網上播出，Dark都很在意網民的反應，「一出條片就會去睇啲留言有冇人鬧我，有啲好深刻嘅，有啲人會話我好寸咁。」他指可能是因為平時說話有些輕佻，或太年輕說話直接而令網民產生錯覺。Dark直認面對同輩說話較直接，但面對前輩，他就選擇收口，「完全係唔夠膽講嘢，見到所有（英皇）師兄師姐都好興奮，因為未見過真人呀嘛！不過最深刻係見到軒仔（張敬軒）……張生，唔係軒仔……係張生。」連稱呼都唔敢亂叫，睇嚟真係好尊敬軒仔噃！「因為佢畀咗好多提點我哋，佢好好……其實嗰日佢唔需要過嚟，但佢都好好，畀意見我哋點樣做好啲個表演，畀好多想像空間我哋去諗嗰首歌要點唱。」

張敬軒有份做《冤枉新秀訓練營》評判。

黃明德坦言見到張敬軒唔敢講嘢。

Busking唱《陀飛輪》被批評
Dark參加比賽前，曾有5個月Busking的經驗，唔講唔知，原來揀地點Busking都要睇級數，「通常係沙田、大圍、旺角嗰啲區，喺我哋Busking界叫做高級啲，好似好勁先去到旺角Busking，但嗰陣我開始Busking冇耐，唔敢去嗰啲地方，咁就留喺啲平民少少嘅地方。」Dark分享Busking走鬼屬平常事，最令他深刻是遇到路人批評，「我喺大圍唱緊陳奕迅嘅《陀飛輪》，本身有幾個人聽緊，突然有個女人好遠行過嚟話『好難聽呀，返屋企啦』，咁就走咗。我呆咗一呆，之後都繼續唱。」他坦言當下感到很尷尬，更因此反思自己，「因為佢一定係覺得我難聽先會咁樣鬧㗎嘛！我返屋企有諗過係咪真係咁難聽，佢本身唔係企喺度睇緊我㗎喎！佢行過咋噃，咁遠都聽到我咁難聽，即係特登行過嚟鬧我，佢已經花咗好多心機去鬧我，佢本身可以就咁行過，佢好用心話我知難聽。」他笑言這次遭遇令他有一段時間不敢唱陳奕迅的歌。他指Busking的確令他變得大膽，很開心可以看到觀眾的即時反應。