林嘉欣畏高天台開工驚到面青回憶澳洲挑戰攀拱橋自稱撞邪

2022-08-10 09:00

林嘉欣最近接拍廣告，與兩位飾演女兒的小演員進行野餐、洗衫、晾衫等親子活動，她不時微笑又細聲說話，但鏡頭一轉，就見站在天台上的她皺晒眉，原來因為畏高，她說：「真係好驚，好彩呢個鏡頭我面向屋外，導演安慰我，叫我專心欣賞風景，我個樣驚到面青。」

林嘉欣在地面開工時，表現輕鬆。

林嘉欣期間仲有講有笑。

雖然嘉欣畏高，但她曾登上世界上最高的鋼鐵拱橋悉尼海港大橋（Sydney Harbour Bridge），她笑言是一次「撞邪事件」：「某年去澳洲拍戲，唔知係咪個人飛咗去第二度特別大膽，總係好想做啲平時唔敢做嘅事，我竟然主動報名參加攀登Sydney Harbour Bridge導賞團，仲幫埋啲同事報名，條橋好高，唔知點解突然好想衝破自己，挑戰吓。」

嘉欣坦言當日早上已緊張肚痛，但已拖同事落水惟有頂硬上：「因為得一條路，開始咗行就無得返轉頭，我怕高，一直向上望，上到頂對腳開始用唔到力，但回程嘅時候要向下望，好清楚望到腳下啲車喺條橋好繁忙，剋服唔到，好驚。我嘅PatPat黐住咗喺地下梯級唔郁得，因為頂住後面其他人，結果我幾乎回程都用PatPat『行』落樓梯。」