獨家丨陳庭欣成屋寵物10億男友唔介意 咪用「超聲波驅狗器」好危險

熱愛小動物的陳庭欣(Toby)於疫情下經營「動物踩過界」YouTube Channel，分享寵物資訊。之前她應邀參加動物領養日，協助貓、狗、兔仔及兩棲類動物物色愛心主人。Toby叮囑，飼養小動物前必須要三思，切勿一時衝動。對於早前劉小慧用「超聲波驅狗器」驅走唐狗行為，Toby擔心對其他狗隻都構成危險。採訪：方騫平

Toby變身「動物界」KOL。

Toby經營「動物踩過界」YouTube channel兩年，有2070人訂閱。

變身「動物踩過界」KOL的陳庭欣之前到茘枝角參與動物領養日，除呼籲領養流浪貓狗外，她又到訪緊急救援棄兔的非牟利機構兔廬(Tolobunny)及兩棲及爬蟲協會 (HKHerp)，Toby邊拍片邊做訪問，好讓更多人知道，原來除咗狗仔、貓仔外，兔仔、烏龜、蛇、甚至蜥蜴棄養率都好高，好需要愛心人士領養。

到兔廬探訪接受領養嘅可愛小兔Clover。

再去兩棲及爬蟲協會見吓烏龜及蜥蜴。

上堂學養寵物

另外，Toby更參加領養貓狗課堂：「我覺得呢個做法好好，因為有好多新手主人，就算有啲做緊主人，但做法未必正確，其實養寵物好多學問，而且每隻脾性未必一樣，往往出現行為問題，先要了解基本，從而學會點樣同佢哋溝通。上堂過程中，學到啲寵物冷知識，我尤其欣賞一家4口，父母帶埋子女嚟上堂，唔想小朋友貪得意去領養。」Toby收養咗4隻鸚鵡，屋企共有6雀兩狗，佢強調彩豐行老闆男友楊振源（Benny）都鍾意狗仔，唔介意屋企變身「動物園」。

好彩男友愛屋及烏，雀及狗都能融入家中。

Toby屋企養咗6雀兩狗，相當熱鬧。

提到早前劉小慧帶愛犬行山時用「超聲波驅狗器」驅走唐狗行為受爭議，Toby就唔太認識「超聲波驅狗器」，但相信有危險性：「如果驅狗器發出好高頻刺耳聲音，咁所有動物聽到都會受到影響，甚至途經嘅BB，由於耳膜太薄都會不適，以為能驅走唐狗，可能傷埋自己嘅寵物都唔知。」

Toby唔贊成劉小慧帶愛犬行山時用「超聲波驅狗器」驅走唐狗。

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrgYZ