獨家丨高海寧得發哥鼓勵學識放開無數次想退出娛樂圈

2022-07-22 08:00

35歲高海寧（高Ling）在《童時愛上你》飾演因失憶變成只得8歲記憶的女強人「Amanda」，演繹時好玩又有難度，不過跟TVB傾續約條件都講求有代表作的她，完全享受當中過程。受童年經歷影響的高Ling，坦承好容易受外界影響，原來曾經無數次想過退出娛樂圈，幸得發哥等前輩鼓勵學識放開。採訪：杜杜攝影：朱偉彥髮型：Zap Tang @Toni & Guy 化妝：@stephenmakeup 場地：Odea@1881 heritage

扮8歲小朋友「彤彤」，高Ling覺得冇任何框框最好玩。

演「彤彤」扮「Amanda」戲份，高Ling覺得最難拿捏。

在《童》劇中高Ling覺得最困難並非扮8歲小朋友「彤彤」，而是「彤彤」扮大人「Amanda」的階段性進步，「因為會跳拍，所以最難係點樣拿捏，佢叻咗幾多嗰啲程度。」今次演「彤彤」，亦令她回憶起自己童年，因在婆婆家長大，父母不在身邊，令她性格變得內斂及缺乏安全感，「我唔可以話係缺憾，但導致我性格比較敏感，對自己要求好高，覺得做好啲先會得到人哋鍾意，所以入行初期會畀自己好大壓力，好容易唔開心。」

高Ling小時候跟婆婆長大，所以感情特別好。

重視生活平衡

在娛樂圈難免活在別人目光下，這種無形極大令高Ling想過無數次退出，「幾努力大家都唔係好接受我，呢樣嘢係令我好大打擊，就算我進步緊，大家點解仲係將焦點放喺我身材度，我唔係淨係得呢一面，我唔介意你欣賞我身材好，但係同時間可以接納埋其他方面。」

高Ling初出道時，好身材確實成為她的主要焦點。

高Ling在30歲後經驗多了，亦聽過好多前輩教路，特別在電影《賭城風雲II》合作過的發哥一夕話，終於能夠釋懷，「佢同我上嘅第一課，就係話我太緊張，對自己要求好高，好多嘢揸得好實，你隻手揸得咁實入面係冇嘢，要打開手先可以擁有全世界，原來佢第一日見我，已發現我有呢個問題，所以我有時啲位好執着時，會提自己要放開。」跟發哥跑步的日子，亦令高Ling學懂生活平衡的重要，「佢係好識得工作同生活平衡，同埋大家咪好興post嘢分享，佢就話好多時可以退後少少，將生活留返畀自己，唔使吓吓都分享出去。」