獨家丨40歲李日朗合資千萬搞元宇宙投資回流簽約TVB又考獲調香師資格

2022-07-16 07:00

40歲的李日朗（前名李逸朗，Don）到內地發展12年，身為家中長子的他，因為想孝順父母而回歸香港，繼拍攝開電視劇集《黑金風暴》外，原來年初已簽約TVB。重投香港電視圈的他，講明只要有角色名及有發揮已滿足，因他已考獲調香師資格，更跟朋友合資8位數搞網上投資公司，有其他搵錢大計，難怪對幕前演出冇壓力。採訪：杜杜攝影：沈健程

Don雖然熱愛投資搞生意，但他無意買磚頭，認為已錯過入巿最佳時機。

Don在《黑金風暴》飾演乞人憎富二代殺人犯，原來最初有兩個角色任佢選擇，「一係做警察，但阿峯（林峯）同唯唯（梁競徽）兩個男主角喺度，好難再發揮，另一個係殺人犯，雖然冇警察咁幾十集連晒戲，我二話不說揀呢個，因反派可以多啲發揮。」而他最開心跟劇中「爸爸」吳岱融一見如故，「好多前輩有佢哋固定演法、套路，但係岱融哥冇，佢會睇你點演再配合你，佢仲nice到喺社交平台放我哋合照，仲寫住『李日朗是一個很好的演員，希望可以再合作』，呢啲平時係我寫㗎嘛！」

《黑金風暴》中，Don跟吳岱融演父子，還有同父異母哥哥黃浩然。

Don大讚岱融哥零架子，兩人合作後還會不時聚會見面。

為照顧父母返港發展

講到今年決定返港發展，Don解釋因有感父母年紀漸老，想多些陪伴，「我走咗6年幾，我係大仔得個妹妹，𠵱家妹妹同男朋友二人世界，應該返嚟關心返屋企。」於是他向TVB叩門，跟高層樂易玲見面後即簽約，「雖然入行咁多年，但喺度係新鮮，我唔介意做任何角色，但求有個角色名就得。」結果公司安排機會讓他跟監製打招呼，「有日全部劇集監製一齊開會，公司安排咗5分鐘畀我入去打招呼，哈哈！係正嘅，就喺嗰一日我衝咗入去自我介紹後，好快收到監製電話。」結果他已參與《法言人》、《輕 · 功》、《你好，我的大夫》和《靈氣逼人》4套劇演出。

Don為做孝順仔多陪伴父母，決定將工作基地搬回香港。

Don跟模特兒女友黃靜藍感情穩定，兩人有計劃幾年內結婚。

踏入四字頭的Don，承認已學懂珍惜機會，「細個根本唔識諗，冇尊重同珍惜過，以前拍《十兄弟》試過自己黐頭套，就咁攞膠水黐上去，如果觀眾有印象，我個頭係歪，仲試過自己覺得歪，搵隻手捉住演晒成場戲，咁騎呢都夠膽，如果𠵱家要人哋包容，首先要過咗自己嗰關。」問到恨不恨演主角？Don想得好開，「都有導演問過我，『你係咪諗住返嚟做主角㗎？』哈哈！當然希望做主角，唔通想返嚟做配角咩，但只要角色有戲演，已經當咗係主角，就好似《黑金風暴》咁，只佔一個單元，故事條線寫緊我，已經係主角啦！」

Don在TVB新劇《輕 · 功》，首度跟黎耀祥合作。

Don坦承拍《十兄弟》時太年輕，未懂得珍惜機會。

掛念嫲嫲學做調香師

Don對於幕前工作睇得好開，只因他有多個瓣數搵錢。「做演藝始終係個等工開嘅行業，我唔鍾意咁，想有啲主導權喺自己手。」其中一樣是他已於年初取得調香師資格，全因掛念嫲嫲，「佢同我好親，走咗17年，我諗唔起佢個樣，但係佢有陣老人家加埋花露水嘅味，我好珍惜，於是趁得閒去學，冇諗過大量生產香水，諗住做訂製，譬如朋友諗住結婚，佢想記住呢件事，我就幫佢做支香水。」不過他暫時未接生意，希望做調配做夠九百小時才開始，但暫時只做了二百多小時。

年初，Don開心取得調香師資格證明。

Don調配香水過程不停失敗，試過調出霉味香水笑餐食。

另外，Don還跟幾位朋友合資8位數，在尖沙咀開設網上投資公司，最初源於他對這類新聞覺得好奇，於是就跟搞金融和投資的朋友了解，由於大家想法一致，半年前決定合作搞公司。早前已舉辦了首個座談會，希望先教識有意投資者了解元宇宙，「我哋請咗專家嚟講，首先教咗大家乜嘢係元宇宙，點樣入場，再根據自己嘅智慧同埋經驗一步步投資，佢可以再搵我哋公司研究有冇合作或者投資嘅計劃畀佢，我哋唔希望一嚟就賺咗人哋第一次錢，跟住冇第二次，呢個唔係我同拍檔嘅原則。」而現在極流行的NFT，他公司亦有提供平台同技術給一班本地藝術家，「我哋邀請佢哋嚟一齊做個藝術家社群去做NFT，我哋免費提供畀佢哋做NFT嘅技術，即係佢只要畀心機創作，其他嘢我哋會支援，希望將呢啲藝術作品，透過元宇宙或者NFT嘅世界，推廣去第二度，等更多人可以認識佢哋。」