《全民造星V》海外招募順便拍真人騷花姐為黑面Ian平反：佢唔識扭計

2022-07-15 17:15

ERROR成員梁業（肥仔）、何啟華（阿Dee）聯同黃慧君（花姐）現身《全民造星V》招募記者會，席間公佈今年增設海外招募，並派出MIRROR正副隊長楊樂文（Lokman）和江𤒹生（Anson Kong）到溫哥華、肥仔和阿Dee到吉隆坡一個星期，除出任評審，亦會以真人騷拍製節目。作為監製的花姐表示節目一直的宗旨是為香港人帶來振奮與希望，多年來節目培育出多位明星，亦會視之為自己的成就。

花姐去年曾擔心肥仔和阿Dee（左）會教壞細路，但見二人工作認真，仲會幫助參賽者。

花姐表示節目培育出多位明星，會視之為自己的成就。

現場播出肥仔和阿Dee於4年前的參賽照，二人與現時做對比，花姐取笑肥仔當年後生好多，阿Dee就瘦好多，又坦言當年簽二人時有反對聲音，但現在證明二人有才華，自己也老懷安慰。今年將有別於過往以靚仔、靚女做標準，首選有才華的人，花姐受訪時被問到可擔心肥仔和阿Dee會教壞參賽者？肥仔搶說：「現在嘅小朋友已經好壞，唔使我哋教。」花姐續表示：「其實去年都擔心佢哋兩個會教壞細路，但佢哋表現到工作認真，仲幫助參賽者激發技巧和才華。」

二人將到吉隆坡一個星期，除出任評審，亦會拍真人騷。

花姐表示當年簽肥仔和阿Dee時有反對聲音。

對於有報道指陳卓賢（Ian）因臭脾氣得罪公司，但扭計成功反而硬搶隊友李駿傑（Jeremy）的出歌檔期，搶先發佈新歌。花姐即為Ian平反：「佢好慘，又俾人話，其實Ian係MIRROR 12個之中最樹熊的一個，睇佢個樣就知佢唔識扭計，佢有個唔好嘅缺點就係好慢熱，同陌生人相處需要時間溝通，可能因為咁被人誤會、好唔抵！其實去年已經計劃幫佢出自己嘅創作歌，但發生一啲問題而延至今年；至於Jeremy未出歌係涉及音樂上嘅技術問題，過兩日會出，而且首新歌好破格。總之演唱會前，MIRROR 12位成員都會出新歌。（Ian的情緒有否受報道影響？）佢當晚即刻有傳訊息俾我，話如果佢態度唔好，我就要小心啲，因為我成日黑面，態度仲衰過佢，佢仲同我講笑。」

ERROR已定於8月出新歌，肥仔笑言：「我又要扭計出5首歌！」然後向住花姐扭pat pat，嚇得對方大叫：「你好肉酸呀！」