Strayz處女作《Stray》出街畫花塊面通宵拍MV

2022-07-14 14:00

由參加《全民造星4》而認識的VAL、CK、暐翹、榛綦及Ariel，自資組成女團Strayz正式出道，出道歌《Stray》亦於昨日推出。MV中眾人以黑白兩個截然不同的造型登場，以突出她們勇闖樂壇的決心。

Strayz隊名源自「Stray（流浪）」一字，隊長VAL、副隊長CK、暐翹、榛綦及Ariel五人自喻是一班流浪的小朋友，而出道作《Stray》由VAL及CK作曲、方浩權、VAL及PetPetShawn填詞，當中的創作概念與隊名亦如出一轍，VAL表示：「《Stray》講緊追夢路途可能會遇到困難，但只要努力，堅持我哋想走嘅路，就可以搵到一條出路。」

全白歌德風格服裝，象徵女團對流浪事情的傷心。

為了突出她們的想法與加入樂壇的決心，歌曲的MV也特別花了心思，以黑白兩個搶眼造型示人，CK介紹兩個造型道：「第一個係喊妝，配以全白歌德風格服裝，象徵住對於流浪呢件事情嘅傷心、不憤、不甘，但係我哋其實係好純潔嘅動物，都有一顆赤子之心；第二個造型有臉部動物彩繪，身上著咗比較正統嘅黑色服裝，象徵住我哋反璞歸真，我哋就係流浪嘅動物，我哋就係咁嘅樣，我哋係高貴嘅存在，唔輸比其他人嘅存在。」

VAL對彩繪造型印象深刻。

CK為新歌MV執導。

驚歎化妝姐姐功力深

談到首次拍攝《Stray》MV的難忘事，Ariel笑言：「我哋5點鐘開始化妝，完成係第二朝11點，完成嗰一下係開心但好攰，出到嚟見到天光，大家都唔識反應，好似就嚟死咁，但係嗰日真係好開心同好好玩。」VAL則對彩繪造型印象深刻，她說：「細細個化過好多次貓嘅妝，但第一次試狗，對我嚟講化一個狗仔嘅妝係一個好特別嘅嘗試，睇住逐一變咗不同動物：兔仔、貓仔，件事好正，對MV好有期待感。」

Ariel對通宵拍MV好難忘。

榛綦的喊裝好搶眼。

暐翹對MV細節好講究。

榛綦亦大讚化妝師的鬼斧神工，「我哋都想畀到驚喜大家，所以妝容上面都落咗好多功夫，變嘅過程好神奇，由喊妝變動物妝，令我好難忘，亦好佩服各位化妝姐姐。」至於暐翹，則難忘在歌曲的演繹上，她說：「因為《Stray》係講緊我哋嘅故事，有好多內心嘢或者拍MV時動作上嘅細節，令我哋諗返由《造星4》開始所有嘅感覺、感受同感觸位。」