獨家丨龐景峰激嬲女友快速𠱁返 帶埋狗仔兔兔行街

31歲的龐景峰(Andrew)入行好耐，但要你講佢拍過乜做過乜，估計除咗佢阿媽郭秀雲，應該冇人講得出，但提到佢啲花邊新聞，大家應該好有印象，例如交過好多女朋友同埋改姓。家陣Andrew同拍拖1年半嘅網紅女友Hailey經常出雙入對，孖住出活動，出PO都會見到一家「三口」，即佢同女友及柴犬「梳打」，之前就見到佢哋一家人加埋兔兔去咗銅鑼灣，當日男方仲激嬲女友𠻹。採訪:娛樂組

一家四口合照，留意女友大髀上嘅兔兔同埋好似望住記者鏡頭嘅狗狗。

去年8月，Andrew曾推出三首自編自導自演嘅MV，製作費更高達7位數，當時佢仲透露籌備緊一部動作大電影，佢好有心呀，希望令香港的動作電影更上一層樓，香港電影業真係好彩有佢咋。

女友好易𠱁
日前傍晚，Andrew同女友現身利園一期，當時地下有寵物用品展覽，仲喺一角設位置供主人及寵物影靚相，Andrew同女友坐喺長椅，「梳打」就坐喺旁邊嘅寵物位，駐場攝影師影完，Andrew交出手電畀工作人員幫佢哋影，然後輪到Andrew幫女友影，望真啲，原來女友仲抱咗隻兔兔出嚟，由於同佢件衫撞晒色，所以發現唔到。影完相，Andrew抱住狗狗及拖住女友去景隆街買兔仔糧，兩人入咗間寵物用品店放低兔兔再行咗一陣，Andrew同女友疑似嘈咗兩句，女方行離店舖，Andrew即步出再繞實女友手𠱁返，之後喺附近行咗陣再返回寵物用品店拎返兔兔先Call車離開。

Andrew幫抱住兔兔嘅女友影靚相。

Andrew抱住狗狗同拖住女友行去景隆街。

兩人喺寵物店行順便放兔兔。

Andrew望住嬲豬離開嘅女友。

Andrew繞住女友手手𠱁番。

本來女友拎住兔仔糧，Andrew主動幫手拎。

Andrew之前拖住做完運動嘅女友去放狗。

男方IG有好多兩人一狗嘅溫馨相。

 

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrgYZ