兩餸飯到水尾？全港兩餸飯店數量增15% 網民：一日有兩間拉閘

不少食肆在疫情下轉型做兩餸飯，令兩餸飯成逆市奇葩大受歡迎，由網民製作的「兩餸飯地圖」最新錄得兩餸飯店數量增長15%，但有網民指出行業競爭白熱化，最近便在一日內有兩間「拉閘」，有供過於求的憂慮，惹來網民熱烈討論。

香港兩餸飯地圖

FB群組「香港兩餸飯關注組」近日由版主提出「兩餸飯係唔係已經到水尾呢？」的討論，該版主曾製作「兩餸飯地圖」，收錄全港約300間兩餸飯店舖位置，他在帖文中表示，由四月下旬晚市恢復堂食起計，兩餸飯地圖淨增長逾50間，升幅達15%。

香港兩餸飯關注組FB圖片

他指出：「兩餸飯係唔係已經到水尾呢？我唔知，但我知今日除有兩間疑似拉閘外，過去一星期更有十間兩餸飯店新開張或即將營業。」

他又謂：「四月時，幾乎每個訪問都會問我，點睇晚市有返堂食之後，兩餸飯會唔會汰弱留強，甚至有倒閉潮。我好記得當時我話兩餸飯有機會好似單剪店咁，成為中下價個人飲食市場既主流之一，與快餐店、茶記、小菜館頂足而立，甚至超越以上三者。而家睇落大致繼續往呢個預測方向發展，將來係點，拭目以待。」

香港兩餸飯關注組FB圖片

網民對兩餸飯是否「水尾」反應兩極：「兩餸飯有佢嘅吸引力，中環開左間即刻大排長龍就知佢仲有市場。」「呢期都少咗食兩餸飯，大約一星期兩次，但問附近啲鋪老闆，話生意冇乜少到，有時星期日仲多咗，可能香港經濟仲未轉好，所以兩餸飯依然有市場。」「其實兩餸飯，真係咁好賺嗎？」「D嘢好食自然有得留低。」「開始進入汰弱留強的階段。」「呢行競爭越嚟越大。」「疫情一日繼續，兩餸飯一日有存在價值。」

來源：香港兩餸飯關注組FB

星島新聞集團慶回歸25周年專題網站，請即瀏覽：https://bit.ly/39AQC3m

立即下載｜全新《星島頭條》APP：https://bit.ly/3yLrgYZ