林家謙8月開首個紅館Show 34度戶外着冬裝影海報竟然冇流汗

2022-06-27 15:00

林家謙由幕後音樂人轉到幕前做獨立歌手，短短3年，就有機會踏上紅館舞台，決定在今個夏天舉行一連3場《SUMMER BLUES 》演唱會。林家謙昨晚（26日）在社交網率先公佈這個好消息，搞鬼將地點寫成：「紅隧旁」，透露將於8月24至26日舉行，7月5日優先訂票，7月14日會公開發售。

因為只開三場被歌迷嫌少，家謙一出post，歌迷已經跪求加場，一班圈中友好林一峰，陳凱詠、陳蕾、黃偉文、少爺占、何雁詩、林欣彤、林奕匡及藍奕邦等紛紛留言恭賀，Tyson Yoshi留言：「好熱哩」。家謙透露會有10張不同款海報，Serrini即留言：「一個演唱會十張海報你set到個standard好高。」有人就叫Serrini下次大佢，一影影20張！十分搞笑。

家謙為演唱會海報拍當日，氣溫高達34度，大隊於一個梟無人煙的海邊，流著汗餵著蚊濕住身，穿梭大海及樹叢之間，用了近8小時拍攝。熱到人都癲，家謙更要配合造型，穿上不同的外套及毛衣配搭，望見都戥他痛苦。不過，神奇地整日家謙冇乜流汗，他笑道：「係喎，還好喎，唔知點解，我都幾熱得嘅喎，哈哈。」

為咗唔好濕水，拍攝團隊真係出盡發寶。

大隊去咗一個梟無人煙的海邊拍攝。

林家謙好緊張睇番拍攝成果。

有船家話個女好鍾意家謙，想佢幫手買飛。

船家叫幫手買飛

在拍攝之間，偶有玩水上活動的朋友經過，一發現是林家謙，即大叫「嘩！林家謙呀！」然後一路等家謙上岸回來影合照，就連幫忙拍攝的船家都忍不住問：「林家謙呀，林家謙你係咪開演唱會呀？我要買飛呀，幫我買飛呀....我個女勁鐘意你。」家謙當時因為消息要保密，惟有笑著亂答船家：「哎也...佢知我哋影演唱會海報呀，佢搲搲飛呀，咁點呀？哈哈....唔知呀....出年啦.....多謝你。」

影了近千張照片，林家謙問：「哎吔，咁多點揀，唔捨得唔用，可唔可以用晒？」最後一向破格的他，揀了十張照片出來做海報，他昨晚已於網上公佈其中兩張，並說餘下有8張，今日(27日) 早上5點開始於全港不同巴士站會見到，並叫歌迷：「得閒見到就拍低up story 然後放入story highlight.儲齊10張就convert to reel tag返我，就有機會送poster入面既限定props（道具） ⛵️🔭🚁🪅… 俾你」。今早家謙再於IG Story 上載第三張海報，寫上：「阿叔瞓唔著出去食早餐見到，其餘靠(repost)你哋啦。」