孫慧雪外傭瘟仔夜歸唔醒 爆姐姐七不思議事件推窗落街最離譜

靚媽孫慧雪今日凌晨突然在社交網出Po向網民求助：「新請咗位姐姐，佢今日放假但到而家2:33am都唔返屋企，你哋覺得應該點做？」原來雪雪好黑仔，曾經請過欠債、偷竊，以及涉犯罪集團的家傭姐姐，並有警察攞搜查令上門，自嘲「唔識睇人」。

聽取網民意見後，雪雪終於忍不住要「爆」嘞！相隔不足半日，就決定怒炒這位只是工作了兩星期的姐姐，透露對方已在朝早6時返家，並瞓到11點才被雪雪叫醒，姐姐聲稱「唔舒服所以唔返嚟」，雪雪終於忍不住對方大話連篇，決定「分手」，並列出這位新姐姐七不思議事件，等大家食花生。

 

孫慧雪凌晨出Po，向網民求教點應對唔返屋企瞓嘅家傭。

 

因為同老公都要工作，真係好需要請家傭幫手做家務同照顧小朋友。

 

孫慧雪話對請姐姐有陰影，真係搞到個人好攰。

 

雪雪之前遇過嘅家傭都好多問題。

 

1. 本來應該到嗰日，即第一日，佢失聯，後來再出現話前僱主幫佢搞farewell party， 所以失蹤咗一日。

2. 嚟到唔做嘢，我洗衣籃滿瀉，我哋問佢係咪唔識用洗衣機啊？不如教你呀，佢話：我識呀，已經幫自己洗咗幾機衫，然後我先發現，係喎！晾起全部都係佢啲衫！

3. 佢嚟到第一日，要求每晚都要有me time做運動，都唔緊要，但係佢晚晚一早就自己收工，唔會再幫手，然後攞瑜伽蓆，換晒full set運動衫，做瑜伽！跟住又係洗自己啲做完運動嘅full set運動衫唔係我哋啲衫⋯⋯

4. 面試時，佢話自己好內向，唔鍾意出街，剩係會匿喺屋企，除非有緊要事要辦先出去，下午兩三點都已經會喺屋企，結果第一日放假，佢話夜晚11點先返，我哋O晒嘴，話佢interview都唔係咁講，佢話我鍾意匿喺男朋友屋企，可能我幫慣外國人做嘢囉，同你哋style唔同😅😅😅😅😅😅😅😅😅😅

5.佢做咗幾日，表明自己就做唔晒啲嘢㗎啦，你哋請多個姐姐嘅時候，我再同佢傾，點樣合作做你哋屋企啲嘢啦😅😅😅😅😅😅😅😅其實我屋企只得我、老公同小朋友，小朋友已經盡量自己湊，接送都係我同老公，有家教老師喺度嘅時候，佢都唔幫我哋執床，自己去咗me time🤦🏻‍♀️🤦🏻‍♀️

6. 最誇張嘅係：第一日入屋，佢用神力推咗我屋企隻窗落街！！！！真係非常好彩係，無傷到人！！！之後佢同我講， 隻窗係自己跌咗落街！（註：隻窗喺工人房）利申：我哋屋企係新裝修，仲要有驗窗，可能係之前啲姐姐整鬆咗，都唔可以完全怪晒佢嘅！不過係我人生入邊一件好難忘嘅事！

7. 叫佢幫我哋攞嘢，佢話佢攞唔到，叫我哋自己攞🤣🤣🤣🤣🤣🤣太多⋯⋯不能盡錄！

雪雪今日接受《頭條娛樂》訪問，透露新姐姐只是工作了兩星期，她聲線超級無奈說：「試過有姐姐話唔想湊小朋友，要我自己湊，真係好難請呀！佢哋睇人恰，我鼓起勇起話佢哋都唔驚，其實我已經好嬲。」她表示兩夫妻都要工作，所以一定要請姐姐，但已有陰影：「真係好嘥錢呀，好攰呀！人生真係。」

 

七不思議事件，真係唔係每位顧主都可以忍受到。

 

隻窗會神奇地飛落街，雪雪就唔多相信。

 

可能雪雪個樣太善良，所以連姐姐都忍唔住要恰佢。

 

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrgYZ