獨家丨65歲林嘉華貪靚漂染灰髮變「銀髮族」三代同堂享受天倫樂

2022-06-26 08:00

65歲的林嘉華自2019年約滿TVB後，與太太劉寶珍和兒子林政峰移居加拿大，嘉華除為加拿大中文電台Fairchild Radio擔任主持之外，閒時與太太四出遊玩，享受半退休生活。

日前嘉華在社交網上載慶祝父親節的相片，向來頭髮烏黑的嘉華，忽然變了「銀髮族」，雖然看來上較蒼老，但已接受自然老去，養尊處優，依然精神爽利。嘉華一家齊齊在屋企打邊爐，飯後仲有甜品，非常豐富，嘉華開心寫着：「慶祝父親節，家中食火鍋，三代同堂，兩個父親個個食到笑呵呵！仲有意大利甜品Tiramisu，食到飽飽去瞓覺。」

林嘉華個樣好似蒼老咗好多。

嘉華唔染髮，一頭銀髮接受自然地老去。

身在多倫多的林嘉華接受《頭條娛樂》訪問，原來是貪靚染金髮後甩色，他說：「因為疫情我推咗好多工作，髮型師建議不如試吓漂白再染灰色，後來退咗色就金金哋，咁當然都生出啲白頭髮啦。」他透露父母已年屆90歲高齡，所以推掉好多香港和內地的工作，抽更多時間陪伴家人，他說：「我爸爸媽媽感情好好，90幾歲仲會拍拖行超市、唱粵曲，但疫情唔想佢哋出太多街，我同太太都留嚟呢邊陪佢哋多啲，不過父母唔想出鏡，都尊重佢哋。」