十八年後2.0丨陳山聰戴金髮著黑絲扮女人被老婆讚靚為神似節食修身

2022-06-23 14:30

TVB現正熱播的劇集《十八年後終極告白2.0》劇情愈趨緊張，昨晚（22日）播出的第18集中，原來陳山聰飾的Jason有易服癖，「易服」戴起長金髮、穿上黑色套裝加粉紅外套，最搶眼當然是一對黑絲襪，他亦於IG貼相留言感謝化妝師之餘，並指希望「冇嚇親大家」：「作為一個演員收到任何角色都一定會盡力去演活佢，我係一個好crazy嘅演員，所以我一定全程投入，首先感謝監製Simon同編審創作咗呢個角色畀我，感謝視帝（譚俊彥）肯陪我癲。」

陳山聰指感謝譚俊彥一同投入演出。

兩個大男人仲要咀嘴同咬唇。

陳山聰扮女人，網友大讚靚女。

但原來都係殺人狂。

陳山聰事後受訪坦言今次演易服癖很大突破，並謂收到劇本時感到愕然：「我第一樣嘢唔係抗拒，而係同監製傾點樣做靚個角色，因為如果醜化咗，觀眾就會好抗拒，所以今次專登搵咗化妝師去設計呢個女性妝。」提到在《金宵大廈2》有全裸戲，現在又要扮女人，山聰坦言完全沒有掙扎：「作為一個演員首先要接受個角色，如果你都唔接受，觀眾又點會接受呢？只會諗點樣去發揮個角色，呈現最好嘅畀觀眾。」山聰又謂做演員真的很奇怪，一化女妝後就十足「上咗身」，自自然然就表現得很女性化。

此外，陳山聰續指在外型上亦下了不少工夫：「因為要着女裝，唔想太大隻，所以都有節食，同埋着咗兩對絲襪遮腳毛。」山聰又謂角色造型相當保密，除了部分演員及工作人員外，就只有太太事前見過他的女裝造型，並讚他「幾靚女」。