孫慧雪豪歎30萬廚師發辦細個同嫲嫲腐乳撈白飯但窮得開心

2022-06-21 21:00

索人妻孫慧雪（雪雪）原來都係出身草根階層，自細同嫲嫲一齊住公屋。昨晚首播的J2節目《貧窮限制想像》，雪雪跟主持人方紹聰（奶仔）一齊體驗奢華生活，入住4萬港元一晚的總統套房、並豪食30多萬港元一餐的廚師發辦（連包場）。

鬼主意多多的奶仔，席間大展身手以鋼琴彈奏《愛很簡單》，並自爆背後有辛酸，奶仔話︰「以前訓練班唔係太多機會，所以學好多嘢增值自己，希望令到啲監製、導演就算唔鍾意我，都因為我嘅技能迫住用我。」他又透露不少技能均是上網自學，其中彈鋼琴是自學、再加張彥博合作拍劇期間對方從旁指導。

孫慧雪獻唱《愛很簡單》，由奶仔鋼琴伴奏。

雪雪同奶仔享受酒店內的按摩設施。

奶仔真係好享受。

一餐廚師發辦連包場，盛惠30萬港元。

雪雪同奶仔一齊體驗奢華生活。

入住總統套房，仲包埋車點對點接送。

雪雪見到大床忍不住跳上去「滾床單」。

同樣出身屋邨的雪雪，則笑指「貧窮」沒有限制其想像，她說︰「反而會多好多想像，細個好窮嘅時候，我哋求其喺地下畫條線，都可以玩跳飛機。」雪雪續指試過跟嫲嫲一起想像將來屋企應如何佈置。雪雪受訪時說：「我細個住北角丹拿山公屋，有條好長樓梯要行上去，同嫲嫲每日都要行出去。試過有次發燒要嫲嫲孭出去，都冇錢搭的士。好多時食飯都冇錢買餸，豆腐、腐乳撈飯就一餐。有時50蚊買餸已經覺得好有錢，會食好啲買條魚嚟食。平時3餐有兩餐都係豆腐撈豉油又一餐，不過我覺得好好味，因為同嫲嫲一齊生活日子超級開心。雖然細個日子好窮，完全冇玩具玩，但有嫲嫲同我一齊玩、行街市已經係我細個嘅娛樂。」

今晚播映的第二集邀請曾主持《3日2夜》及《姊妹淘》的吳紫韻（Purple）做嘉賓主持，介紹「萬事」系馬主伍燕梅女士，伍女士養的錦鯉加起來總值超過1,000萬港元，單是魚池就花了數百萬建成，相當厲害。