容祖兒金光閃閃下慶祝42歲生日阿Sa搶吹蛋糕蠟燭報仇成功

2022-06-16 15:00

今日是容祖兒（Joey ）的42歲生日，正身在內地工作的她仍不愁寂寞，獲好姊妹蔡卓妍（阿Sa）、鍾欣潼（阿嬌）及經理人霍汶希（Mani）送上驚喜生日派對。三人在零時準時在社交網貼文為Joey慶生；又上載開party慶祝的照片，現場所見有大量金色氣球佈置，兩個蛋糕及一束鮮花，Joey以一身白色打扮示人，大晒纖腰，而三位更向壽星女肉緊獻吻，場面溫馨。

生日會佈置以金色為主，好靚呀。

Joey感激三位好姊妹，原來Mani更是專程飛往內地為她慶祝：「有一位特登飛過嚟，有兩位攰到剩返個軀殼都盛裝打扮過嚟，這個生日能給我親眼見到摸到真感恩，哪怕俾佢吹晒我啲蠟燭又有咩所謂啊。」Joey 表示昨晚（15日）沒有大肆慶祝，只是去了按摩獎勵自己，她續指：「開心，當然，但更多是內心的平靜和溫暖，因為我收到好多好朋友的祝福，有些連群結隊在12點前給我視像，望到一個個熟悉的面孔，眼淺的我又好無出息咁眼濕濕，大家各自生活，各有自己我煩心的事，能夠記得，並且拿起手機給我送上一句生日快樂，然後再順理成章閒聊幾句，這些都是令我心滿意足的事，人生短短幾十年你所做過的事情無論有幾多，我認為最值得珍貴嘅是人與人之間的感情。多謝我媽媽，生日快樂容祖兒。」

慶祝生日又點少得阿嬌（左）同阿Sa（右）。

經理人Mani （左）專程北上為祖兒慶祝。

蔡卓妍報仇搶吹生日蠟燭

阿Sa留言搞笑指自己成功「報仇」吹走蠟燭，她謂：「Happy birthday ! 好開心今年終於吹咗你支蠟燭，歡迎你下次吹返我嗰支 #願望一齊許 #我嘅即係你嘅你嘅即係我嘅」而阿嬌則大讚Joey是溫暖的小太陽：「祖兒生日快樂，你就像是一個小太陽，和你在一起的時候周圍總是充滿陽光溫暖和歡笑，好幸運有你在身邊也好開心每年的生日都能陪你一起過，我們愛你。」

另外，多年好友黃偉文大派福利貼出當年Joey演唱會試造型的絕密照片，他坦言大家已經有一年沒有見：「作為你『（multifunctional）背後的男人』，今日我決定曝光你兩張絕密照片。都係上次演唱會我哋搵咗返嚟而冇著到，但其實幾靚嘅衫，來『福利』一下大家。已經一年冇見面，破晒我哋相識以嚟嘅紀錄，如果仲未見到，我怕我會放多幾張出嚟，畢竟我手上有大量你嘅絕密材料哈哈哈。今年生日，願你和家人身體健康，快樂與良善不變如初。」