獨家丨鄧月平靠中醫生意補貼音樂支出藝術無價投資6位數出新歌MV

2022-06-14 07:00

鄧月平（Larine）近年自資成立工作室，最近仲推出新歌《夜》，唱出喺疫情下嘅孤寂及無力感。第5波疫情對Larine工作有影響，不過她堅持香港呢刻需要一首慢歌，畀大家可以抒發吓心情，她更耗資6位數字製作MV，認為藝術係無價，冇得計較。採訪：方騫平

Larine堅持藝術係無價，冇得用錢嚟衡量。

鄧月平堅持藝術無價。

24歲嘅鄧月平以獨立歌手身份勇闖樂壇，有感於疫情期間，生活及工作上嘅改變令人迷失方向，尤以夜晚感覺更加強烈，負面情緒籠罩住世界，所以成為創作靈感，由她作曲及有份選歌詞。不過她強調不是放負：「因為後段歌曲歌詞有句『風掠過，漸忘我，就如我，變星火』，歌詞其實係由唔好到好嘅美好蛻變，呢啲『孤獨病』應該得到好多人嘅共鳴。」

近年Larine以獨立歌手身份進軍樂壇。

24歲嘅Larine有樣又有靚身材。

乜都計錢就失去意義
《夜》耗資6位數字製作MV，更請嚟老友林耀聲做男主角。為咗唯美，除咗換上多個造型，更租用製雪機營造落雪效果，Larine身穿露肩皮裙喺雪中漫步，導演還加入悲傷嘅喊戲，鏡頭前嘅Larine喊到一發不可收拾，差啲窒息，相當投入。對於蝕住錢出歌，Larine坦言計錢就會失去意義：「喺香港做娛樂圈冇得計錢，吓吓去計算會迫死自己，藝術係最原始嘅嘢，唔可以忽略，尤其係年青人有責任話畀人知，做藝術一啲都唔戅居，為咗理想，只好喺經營嘅中醫診所收入度補貼做音樂嘅支出啦。」