Juicy叮｜大學生攜家長見工 母憂「答得唔好」全程搶答

父母過分保護子女，或令他們變成溫室小花。一名網民於討論區發文指，近日有一名應屆大學畢業生攜同母親到公司面試，其母親因為擔心兒子表現不佳，故「搶答」大部分面試問題。該名網民得悉事件後，批評該名母親好心做壞事，令兒子無法自立，或變成「裙腳仔」。

該名網民於「香港討論區」發文指，近日公司招聘新人，希望聘用應屆大學畢業生，令公司感覺「可以年輕啲」。面試當日早上，人事部職員領著一男一女到會議室面試，一問之下竟發現該名女士原來是應徵者的母親，應徵者無奈指，「媽咪一定要跟住佢嚟見工」。

樓主指，人事部職員著應徵者的母親於外面或隔壁房間等候，惟對方卻指，「擔心個仔可能答得唔好，所以佢要跟埋一齊入嚟in（面試）」，職員遂向上司詢問意見，最終上司同意破例讓她進入會議室。樓主指，面試歷時約半小時，形容上司全程敷衍了事，期間詢問該應徵者3條問題，惟均被其母親搶答，「成程除咗佢（應徵者）個名之外，都冇聽過佢講其他嘢」，令上司甚感不滿，大嘆「第一次見到人真係帶埋個阿媽上嚟」。

大學生攜家長一同面試，稱「媽咪一定要跟住佢嚟見工」。Unsplash圖片

樓主坦言第一次遇到有家長陪子女見工，批評此舉或令兒子無法成長，「成世都搵唔到嘢做」，只能一直依賴父母，形容這種教育方式百害而無一利，「唔係想話佢『裙腳』，但係使唔使咁保護呀？保護得太好，真係溫室小花」。

帖文引起網民熱論，不少網民笑言，「技術性問題阿媽都識答，咁請佢阿媽好過」、「如果我係HR，我都唔會阻住阿媽入來，當睇笑話」；有網民則揶揄，「一份人工請2個人，諗得過喎」、「可能係阿媽想見工，叫仔女嚟壯膽」。

資料來源：香港討論區

立即下載｜全新《星島頭條》APP：https://bit.ly/3yLrgYZ