古天后日誌｜買賣兩閒港股偏向淡靜

5月13日，密雲，間中有大雨及狂風雷暴。隔晚美股表現反覆，三大指數個別發展，道指跟標指分別跌103點及5點，前者已連跌六個交易日，納指則倒升6點收市。4月份美國生產物價指數(PPI)按年升11%，高過預期的升10.7%，撇除能源和食品的核心PPI按年漲幅8.8%，略低過市場預期的8.9%。PPI高企，加上虛幣市場跌到一仆一碌，早段令美股插水，不過其後10年債息回落至2.86厘，重返3厘樓下，多得鮑爺重申6月及7月加息0.5%，即進一步確定排除加息0.75厘嘅講法，債息短期見頂，美股市有望喘定。

資金蒸發難大量流入股市

不過，美股喘定回穩後能否急速反彈，呢方面古天后睇法相對保守，畢竟虛幣一輪爆煲後，即使有反彈，但市場資金已蒸發，虛幣暫時跌定咗，只係減低咗資金喺股市沽貨套現嘅壓力，唔代表會有大量資金流入股市，支持美股大幅反彈。

至於A股跟港股落就唔多肯落，但升呢又欠缺成交配合，動力有限，加上今日周末前夕，可能又陷入買賣兩閒局面，窄幅波動，悶局一場。內地快將公布MLF利率，喺人民幣走弱下，短線基本無乜減息空間。加上經過兩度降準後，暫時市場資金唔算緊絀，暫時無必要再向市場放水。既然市場短期唔見再有新資金流入下，港股淡靜嘅事實已難扭轉，北水集中買住幾隻重磅科技股，其他股份表現乏善可陳。

雖然近日間中有個別三四線股仔落鑊炒作，但從來呢啲股仔純由莊家操控，散戶入場通常都係贏完粒糖之後，就輸返間廠。即使坊間有唔少「專家」積極推介，古天后唔敢妄言係夾埋莊家散貨，但眼見呢類股仔，連升多日後，但有足夠散戶入場參與，就出現一日急跌五六七八成慘劇，散戶被割韭菜，成為莊家點心幾乎係無可改變嘅事實。既然如此，又何必貪圓呢啲蠅頭小利，倒不如靠邊站，食下花生算數，古天后都係堅持唔會沾手莊家股。

古天后

(徐狄怡，證監會持牌人)