古天后日誌｜暫未見新資金流入 港股需時整固

3月25日，多雲，間中有驟雨，沿岸有薄霧，早段局部地區有雷暴，午後驟雨減少。隔晚美國公布經濟數據好壞參半，但新申領失業救濟人數創53年新低，帶動美股做好，三大指數上升，道指升349點；標指跟納指分別升63點及269點。值得留意，近期油價上升而科技股遭拋售，令標普500能源指數與標指自2001年以來首次出現反方向發展。分析指，上次出現此現象係科網泡沫時，或意味衰退將來臨。

雖然美股做好，但港股ADR指數則向下，夜期亦偏軟，預期今日港股亦略為向下。自從2月底俄羅斯入侵烏克蘭以來，國際金融協會(IIF)數據顯示，投資者以「前所未有」嘅速度將資金撤出中國，反映全球新興市場資本流動出現「極不尋常」嘅轉變。雖然IIF最近嘅報告指出，高頻數據顯示，儘管流入其他新興市場嘅資金保持增長，但中國股票跟債券市場遭遇大量資金流出。呢個情況出現，估計係俄烏戰爭爆發後，外國投資者可能正在從新嘅角度看待中國，不過依家係無法喺呢方面得出任何明確結論。

官方數據顯示，2月份外國投資者對中國國債嘅減持規模創下紀錄最高，部分原因係俄羅斯與烏克蘭戰爭促使全球固定收益投資者贖回。制裁凍結咗俄羅斯央行持有的歐元及美元外匯儲備，導致市場猜測莫斯科可能出售所持中國資產來籌集資金。另一方面，海外投資者撤離嘅部分原因是擔心美國和歐盟對俄羅斯嘅制裁可能以某種方式蔓延到中國。幸而中國決策承諾支持資本市場，中港兩地股市自上周以來已經開始反彈。不過外資流出中國市場，暫時係由贖回推動，並非與新資金相匹配，因為新資金需要持續流動才能保持投資，特別係債券投資。很可能喺未來幾周或幾個月內恢復淨流入。

所以古天后傾向相信無論港股或內地股市，上周嘅低位，極有可能已見咗上半年，甚至全年底部，而港股由18200水平反彈至22000水平，亦開始遇到獲利回吐，喺缺乏新資金流入下，暫時港股難以進一步向上突破，有可能喺22000上落整固，暫時喺21600至22200幾百點之內上落，直至下周期指結算後，先再有方向。

古天后

(徐狄怡，證監會持牌人)