季前賽丨Edan貼兄弟瞓覺黑圖賀劇集煞科唯獨姜濤係奸笑相夠搶鏡

2022-05-10 14:00

由MIIRROR成員姜濤、陳卓賢（Ian）、呂爵安（Edan）、邱士縉（Stanley）以及ERROR的郭嘉駿（193）和梁業（肥仔），還有張繼聰等，合演的ViuTV新劇《季前賽》，經過多月來在疫情下拍攝，直至昨日（9日）終於煞科，而Edan即在社交網貼眾人「瞓覺黑圖」，向鏡粉和404（fans暱稱）大派福利，但惟獨姜濤的一張與別不同，零舍搶鏡。

劇集在早前疫情嚴峻下斷斷續續拍攝。

Edan化身劇中角色「關浩德」留言：「《季前賽》今日（昨日）煞科了！德仔決定post啲眾生相比大家睇，事實證明，睡眠是很重要的，期待《季前賽》出街！」被Edan貼出瞓覺黑圖的有Stanley、193、肥仔及張繼聰，全部皆是「低炒」拍攝，個個露出鼻哥窿、口擘擘，而Edan雖然也有貼出自己的瞓覺相，但卻完全不是黑圖。至於姜濤的一張則破格不是瞓覺；反而是咧嘴的奸笑樣，而姜糖（fans暱稱）則代偶像留言：「勝利者笑容！」、「姜濤心諗：想影我黑圖，冇咁容易。」另外，亦有心水清網民好奇為何沒有Ian的黑圖。

張繼聰今午貼出大家開香檳的相片。

以角色名關浩德留言指劇集煞科。

黑圖系列，肥仔。

Stanley

而張繼聰今日貼出眾人開香檳慶祝煞科相片，又貼出一張Edan的靚仔瞓覺相，除了大談跟一眾年青人合作感受外，他亦有就Edan貼黑圖留言謂：「幼雀，你睇阿叔幾錫住你吖？影到你瞓著都咁靚仔，算係咁啦，以德報怨吖，咪叫成熟囉。不過你班兄弟就唔知會唔會啦，Stanley ，我係你就唔忍佢啦，你嗰啲核彈級⋯⋯另外，姜，你做掌上壓嘅片，我係唔會公開嘅，放心。」Edan即留言：「緊係以德報怨啦！因為……我叫阿德。」不過Stanley似乎贊同張繼聰的講法，他謂：「一人一張呂爵安黑圖計劃正式開始！」