荃灣豬肉檔AK爆紅真面目曝光「生粉」失望話唔似

2022-05-07 19:30

近日最多人談論嘅熱話，一定係呢位「風度翩翩嘅豬肉佬」。呢位型男個名叫「阿威」，濃眉大眼，金髮配銀鏈、再加反領Tee露出紋身，有人稱佢為「荃灣AK」，亦有人話佢似小豬羅志祥、MC張天賦、吳卓羲等等，唔少人都專程去荃灣楊屋道街市「朝聖」，買成幾百蚊豬肉。

荃灣豬肉檔AK每日都set行個頭開工。（圖片來源：荃灣鮮肉AK應援團）

唔少街坊帶埋小朋友一齊打卡。（圖片來源：荃灣鮮肉AK應援團）

呢位「風度翩翩嘅豬肉佬」真係經典。

戴住口罩好多人話似AK。

連日嚟吸引唔少媒體爭相採訪，仲有人幫佢咗開Facebook群組應援團。網民們除咗分享與「小鮮肉」嘅合照及報導外，更有網民貼出疑似「小鮮肉」除口罩露全相的照片。不過，照片一出，唔少AK嘅粉絲都大呼失望︰「可唔可以唔好叫佢AK呀！」、「一啲都唔似AK、MC」、「其實邊一忽似AK」。好多人都認為相中人比較似沈震軒或羅志祥，亦有網民留言請對方都係戴返口罩比較好啲。

日前阿威接受傳媒訪問時，身邊仲出現一位自稱「經理人」嘅男士話要再聯繫工作室安排。阿威話有少少受寵若驚，自問唔似明星，更謙虛指自己顏值10分裡只拎6分。提起感情狀況，阿威大方表示其實已有另一半，亦有網民爆料指佢已婚有小朋友。