余德丞離巢1日即返新工拍住Do姐做DJ緊張到爆暗瘡

2022-05-03 11:00

現年32歲的余德丞（Dickson）近年憑劇集《青春不要臉》人氣急升，5月1日突然在YouTube宣佈已離巢，與TVB結束8年賓主關係；當時未有透露去向，但就大爆自己一直對公司未能澄清點燈續命傳聞一事耿耿於懷。

離巢短短一日，Dickson已經有第一份新工，原來是到商台擔任《口水多過浪花》的客席主持，與Do姐鄭裕玲、余迪偉和傑朱一齊做節目。昨日Dickson將第一日工作全記錄，拍片剪片全部一腳踢，好有衝勁！片中見Diskson朝早10點半便起身刷牙洗面，食埋個早餐就自己揸車出發到商台，由於錄音室不准拍攝，但亦有上載幾位主持的大合照，眾人亦有送上蛋糕，祝賀他開工大吉。

Dickson朝早10半就起身，睡眼惺忪，將第一日返新工全部記錄低。

揸車返工，個樣好精神好有衝勁！

原來係返商台。

為《口水多過浪花》開咪。

錄影完畢後，Dickson坦言第一日開咪表現太緊張，他說：「平時我就真係口水多過浪花，但今日去到《口水多過浪花》就真係一滴口水都冇，好緊張又驚講錯嘢。所以...做節目同平時做人吹水係唔同。」期間突然發現眉宇之間的暗瘡在短短一個節目時間已經「熟透」，可見佢情緒真係好高漲。雖然第一次表現麻麻，但他就舉起三隻手指發誓下周一再開咪，會更放膽給予讀者意見，做得更好。

做完節目，立即爆瘡！睇嚟真係好緊張喎。

雖然係客席主持，但Diskson就話發誓下次會做得更好。

拍片剪片全部一腳踢。

談到為何會做DJ，Diskson指在2011年大學畢業後，曾申請過做商台節目編導（PA），但因犯了一個超級大錯誤，最終連面試機會都沒有。他說：「我係串錯咗人哋個姓，Mr.KWOK，我串錯KOWK，難怪會冇回音。好好彩，多謝商台，多謝Do姐，隔咗11年後畀多次機會我，喺大氣電波開咪，我會繼續努力，雖然有啲行，但就講到呢到，因為現在乜都係一腳踢，趕到今晚畀大家睇。」Diskson亦有在社交網留言：「十年前想做嘅一件事實現了！」