古天后日誌｜港股乏資金流入僅低位橫行

4月29日，大致天晴，早上沿岸有霧，日間酷熱。隔晚美股反彈，美國GDP首季倒退1.4%，反而成為市場炒上藉口，因為經濟表現未如預期，市場憧憬加息步伐或未如預期般快。加上Facebook公布業績後勁彈近18%，帶動大型科技股做好。道指升614點；標指跟納指分別升103點及382點。不過蘋果公司及亞瑪遜業績不似預期，兩股盤後分別跌2%及9%，拖累美股期貨向下。

美股近日大幅波動，忽上忽落，反令機構投資者更為保守，傾向持有更多現金，加上債息高企，令投入股市嘅資金買少見少。雖然美股每次急插均吸引投資者趁低吸納，但投機性買盤每每趁反彈就急急套現，未會於市場久留，令美股表現反反覆覆，進入上落市格局。

大戶上下其手 好淡通殺

至於港股則進入悶局，恒指20000大關失而復得，不過喺北水開始休假後，入場資金買少見少，進入買賣兩閒局面，加上下周美國聯儲局議息，市場傾向離場觀望。而古天后於早前回落至20000水平撈貨，亦於假前逐步減磅，保持輕倉渡周末。雖然港股根據黃金比回調後，有條件再作另一輪反彈，可惜資金方面未能配合，反彈動力難如3月中強勁，唔排除短期入進入窄幅上落，於千點內穿梭，跟隨牛熊證重貨區變化，大戶上下其手，好淡通殺。又或者喺連續兩個星期長周末下，僅能於20000水平橫行。

值得留意係近日資金開始轉炒二三線股仔，呢個並非好現像，而個別股份急升後，亦出現單日急跌，有消息指係中資行再度收緊孖展額度，以至出現個別股份洗倉式下跌。而日圓弱勢，兌美元跌至130水平，兌港元則跌穿6算，而日本方面則繼續維持貨幣寛鬆政策，更令日圓跌勢一發不可收拾。美匯高企下，人民幣亦走弱，噚日再度跌至逾半年低位，人民幣跌勢未止下，只會加快資金從中港股市流走嘅速度。中港股市縱使估值便宜，但缺乏資金流入，即使止住跌勢，亦只能低位徘徊。

古天后

(徐狄怡，證監會持牌人)