獨家丨陳曉華忙到同阿媽關係疏離 強調同方力申只係朋友

TVB劇集《食腦喪B》中陳曉華(Hera)戲份唔多，但演「麻甩女神」角色相當養眼。由於劇集是兩年多前的存貨，Hera睇預告聽到自己把聲走音覺得好古怪，惟有自我安慰：「期待睇到自己可愛嘅一面！」追問她可有請教緋聞男友方力申意見時？她即說：「我哋唔係時常聯絡㗎，希望佢快啲搵到真命天女。」採訪：方騫平 攝影：沈健程

陳曉華唔認係上位小花，強調只係𠵱家演出機會比以前多。

陳曉華話《食腦喪B》見她「可愛一面」。

《食腦喪B》係陳曉華的第二套劇集，當時完全唔知演戲係乜，就算監製講解完都拿捏唔到，做唔到佢嘅要求：「所以演出時真係唔知點算好，講對白時心跳到180，完全控制唔到嗰份緊張心情，哈！希望觀眾接受到我『可愛一面』，好彩Keep住有劇拍，應該會見到我有進步，對我會有改觀。」

劇中陳曉華角色比較豪邁，同現實中相似。

劇中有清純學生妹Look。

監製大聲教戲唔尷尬

正受力捧的Hera播出處女劇《迷網》時被觀眾狂轟演技，直至戲份較重的《異搜店》得到監製等前輩提點：「係人都聽到，反而嗰時唔係好大壓力，因為想做好啲，要認真聽大家畀我嘅意見，好記得有位同劇演員話『日日都聽到監製咁重語氣都唔喊喎！』我話係呀，因為真心想改善演技。不過，有次都怪自己達唔到要求好失望，曾消極咁爆喊一晚，一度有做返護士老本行嘅念頭，但瞓醒又冇事，𠵱家好enjoy拍劇。」

處女劇《迷網》曾被鬧「戲屎」，令她決心要改進。

陳曉華拍《異搜店》時，好拍檔何廣沛有指導她演技。

問到可有問方力申意見？Hera反問：「點解問佢？真係冇呀！我會問返同劇演員。」對於突然同小方傳緋聞，Hera一頭霧水：「我哋以前合作過係朋友，但唔係常聯絡，我𠵱家由朝到晚拍劇，花好多時間做準備功夫冇時間拍拖，𠵱家我同媽咪關係都變得好疏離喇！緋聞唔係真㗎，我都想佢快啲搵到真命天女。」

陳曉華同方力申曾合作，強調唔係拍拖。

有指陳曉華獲方力申送狗公仔力追，網友又留言迫方力申認愛。

 

陳曉華樣子清純甜美，加埋高高瘦瘦都幾養眼。

更多第5波疫情資訊，請到以下專頁瀏覽（按此）
立即下載 | 全新《星島頭條》APP : https://bit.ly/3yLrgYZ