古天后日誌｜中港兩地股市乏資金易跌難升

4月27日，大致天晴，早上有霧，日間天氣炎熱。美匯指數創兩年高位，市場傾向相信聯儲局收緊貨幣政策步伐或加快，同時亦憂慮整體經濟放緩而基本面開始顯著惡化。除咗俄烏戰事持續，甚至可能引發核武威脅外；美國通脹削弱消費需求；而中國經濟危機影響到美國科技業嘅大客戶，因為美國對中國半導體行業有一定依賴等等。隔晚美股三大指數顯著下挫，道指跌809點；標指跟納指分別跌120點及514點，納指更跌穿3月份低位，創今年新低，較高位回落23%。

美股近日走勢改變唔少投資者睇法，就連一直對美股審慎樂觀嘅大摩，亦已轉軚，唔單止全面睇淡，更預警熊市將至。不過古天后則認為美股早已步入熊市，3月底嘅反彈亦只不過係熊市中嘅後抽反彈。高通脹固然損害到企業盈利，即使防守型嘅股份估值亦變得昂貴，似乎已無乜上漲空間，即係板塊之間已無乜值得換碼跟輪動，大摩認為隨之而嚟嘅係指數有機會大幅下跌。

港股估值冇美股咁貴

至於港股相對估值唔似得美股咁貴，可惜當港股喺3月中跌至18200水平展開反彈後，僅兩日超大成交，其餘日子成交又再回復平淡，而恒指升至22400水平未能進一步突破向上，反彈浪亦告一段落，再度回軟。喺人民幣疲弱下，中港股市回復弱勢，已港股亦重返20000水平之下，大量牛證近日被回收。恒指已完全回補3月中所出現嘅上升裂口，但回補裂口後，大市並未有作出強力反彈，主要係市場缺乏資金流入下，港股只能喺低位爭持。

雖然阿爺已出招放水，降準為市場提供更寛鬆嘅流動性，只可惜中港兩地股市只係跌勢略為放緩，並未見止跌回升，講到底都係缺乏資金流入市場，再加上外圍股市走弱，中港兩地股市易跌難升。

古天后

(徐狄怡，證監會持牌人)