古天后日志｜中港两地股市乏资金易跌难升

4月27日，大致天晴，早上有雾，日间天气炎热。美汇指数创两年高位，市场倾向相信联储局收紧货币政策步伐或加快，同时亦忧虑整体经济放缓而基本面开始显著恶化。除咗俄乌战事持续，甚至可能引发核武威胁外；美国通胀削弱消费需求；而中国经济危机影响到美国科技业嘅大客户，因为美国对中国半导体行业有一定依赖等等。隔晚美股三大指数显著下挫，道指跌809点；标指跟纳指分别跌120点及514点，纳指更跌穿3月份低位，创今年新低，较高位回落23%。

美股近日走势改变唔少投资者睇法，就连一直对美股审慎乐观嘅大摩，亦已转軚，唔单止全面睇淡，更预警熊市将至。不过古天后则认为美股早已步入熊市，3月底嘅反弹亦只不过系熊市中嘅后抽反弹。高通胀固然损害到企业盈利，即使防守型嘅股份估值亦变得昂贵，似乎已无乜上涨空间，即系板块之间已无乜值得换码跟轮动，大摩认为随之而嚟嘅系指数有机会大幅下跌。

港股估值冇美股咁贵

至于港股相对估值唔似得美股咁贵，可惜当港股喺3月中跌至18200水平展开反弹后，仅两日超大成交，其馀日子成交又再回复平淡，而恒指升至22400水平未能进一步突破向上，反弹浪亦告一段落，再度回软。喺人民币疲弱下，中港股市回复弱势，已港股亦重返20000水平之下，大量牛证近日被回收。恒指已完全回补3月中所出现嘅上升裂口，但回补裂口后，大市并未有作出强力反弹，主要系市场缺乏资金流入下，港股只能喺低位争持。

虽然阿爷已出招放水，降准为市场提供更寛松嘅流动性，只可惜中港两地股市只系跌势略为放缓，并未见止跌回升，讲到底都系缺乏资金流入市场，再加上外围股市走弱，中港两地股市易跌难升。

古天后

(徐狄怡，证监会持牌人)