MC拎《造星II》亞軍紅過冠軍Phoebus 網民分析：錯Timing

2022-04-26 19:00

ViuTV於2018年搞《全民造星》為娛圈注入不少新力軍，第一季的成功捧出MIRROR及ERROR兩隊人氣男團，但當時不足一年又開第二季，更加入MIRROR成員與《造星II》參賽者一同競爭，網民都話有啲唔公平。不過《造星II》雖然冇《造星I》咁多人跑出，但都成功造到星，今年連奪多個樂壇新人獎的MC（張天賦）正是《造星II》出身，身為亞軍的他而家明顯紅過冠軍Phoebus（吳啟洋），網民都討論起這個現象。

MC是去年的新人，已奪多個新人獎。

MC（右）是《造星II》亞軍，知名度比冠軍Phoebus（中）高引起網民討論。

網民開Po分析原因引來好多網民討論。

昨日（25日）有網民於「連登討論區」指《造星II》時MC只得亞軍，但而家風生水起，反而冠軍的Phoebus發展明顯不理想，「點解會咁？有冇人分析吓原因？」帖子引來大量網民討論，成為熱門話題。甚至有人忘記冠軍是誰，直指Phoebus未能一出道即爆紅最大原因是參加比賽的時機唔啱，「Timing錯晒，以佢package玩第一屆入MIRROR絕對會紅好多。」又指MC除了有唱功，亦都好識諗沒有即時簽ViuTV，估計他是怕與MIRROR同公司難以發圍，「有啲痴線，想像唔到張天賦唱迷迷魂魂十二萬轉（P1X3L《Braceless》歌詞）。」甚至有人重提Phoebus在《造星II》存在感不高，當時是爆冷奪冠。

同是《造星》出身的冠軍，姜濤（左）同Phoebus不時被攞嚟比較。

有網民唔記得邊個係冠軍……

有網民認為Phoebus如果參加《造星I》會紅好多。

有網民慶幸MC冇入男團。

網民希望Phoebus更放開自己。

有網民認為Phoebus發展已經好過好多《造星》參賽者。

其實Phoebus在比賽後，與《造星II》的歐鎮灝（George）及葉振弘（Marco）組成男子組合P1X3L，雖然有簽環球唱片，但與ViuTV仍有藝人合約。有網民認為因為與ViuTV有合約，P1X3L難全面向歌手路發展，主持及拍劇仲多過唱歌，加上已經有MIRROR及ERROR的偶像男團在前，難搵突破位。相反MC簽華納唱片就可以專心做歌手，比起做多棲藝人更易跑出，有網民甚至戥Phoebus可惜，希望他不要灰心，同時鼓勵他放下偶包拍劇做主持，從另一路線跑出。