MC再次力壓Edan拎新人金獎　爵屎派嬲驚訝主場都輸

2022-04-25 21:00

昨晚（24日）舉行的《Chill Club 推介榜年度推介21/22》MIRROR成為大嬴家，除了團體獎項，多位成員都以個人身份奪獎，大會講明獎項係一人一票選出，擺到明係鬥人氣同Fans多，不過賽果仍然惹來不滿。

Anson Lo力壓姜濤奪得「Chill Club年度男歌手金獎」，引來姜糖力斥大會造假。

姜濤話Fans爭拗無損兄弟情。

其實除了Anson Lo（盧瀚霆）力壓姜濤奪得「Chill Club年度男歌手金獎」，因而惹姜糖（姜濤Fans暱稱）力斥大會造假。另一個引起討論的獎項就是新人獎，今年金銀銅分別由MC（張天賦）、Edan（呂爵安）及193（郭嘉駿）奪得。MC去年推出多首歌曲，歌唱實力備受肯定，年初已獲頒發「叱咤樂壇生力軍男歌手金獎」，當時亦是力壓Edan奪金。賽後ViuTV官方facebook出Po公佈新人獎得主，即時引來部份爵屎（Edan Fans暱稱）派嬲嬲！

ViuTV facebook分享新人獎賽果，個Po有好多嬲嬲。

MC再次力壓Edan拎新人金獎。

年初叱咤，MC都係拎新人金獎。

爵屎認為Edan得獎感言比MC更大方得體。

有爵屎對於賽果表示驚訝，「主場都輸？」睇嚟本來看好Edan以人氣取勝，有爵屎就認為MC得票率比Edan高出逾6萬票太誇張，似乎想暗指大會造馬，不過都有網民質疑如果要造假，點解唔直接頒個金獎畀「親生仔」Edan呢？雖然有好多爵屎戥Edan唔抵，不過都表示會繼續支持Edan。而部份爵屎不滿MC奪金的原因，似乎都不是否定他的歌唱實力，反而是批評MC的態度，認為佢太寸，相反就力讚Edan謙虛得多嘞！因而都引來網民提醒，這個是樂壇頒獎禮呀！至於193奪新人銅獎，其實都有人質疑，有網民留言批評他唱功唔掂，不過都明白這個是投票所得的賽果，建議ViuTV明年將獎項改名：「這個獎應改稱為新人人氣獎，這結果抹殺了真正因作品獲得亮麗成績的新人歌手。」