獨家丨吳卓羲風騷踢爆張建聲「黑材料」 拍《逃獄2》興奮演反派
2022-04-26 07:00 
將於本周四上映的電影《逃獄兄弟2》除有原班人馬譚耀文、栢天男、張繼聰及張建聲外，仲新加入演反派角色嘅吳卓羲（Ron）。早前Ron同菊梓喬傳緋聞，訪問當日Ron顯得非常風騷，仲大爆不在場的張建聲「黑材料」，指他教前輩做戲，擦損少少又鬼殺咁嘈，好搞笑。採訪：方騫平 攝影：沈健程 化妝：Marsha Ma(吳卓羲)、Jennifer @Annie G. (栢天男) 髮型：Ian Wong@ii salon(吳卓羲)、Kenki @ w workshop(栢天男) 服裝：@amiparis @ithk (栢天男)
《逃獄2》中吳卓羲飾演囚犯，仲係一個大反派，跟以往常演性格衝動嘅警察唔同，所以演得好過癮：「其實演反派仲好玩，可以亂嚟有好大發揮，反而拍警察嘢要好小心，好怕畀觀眾捉到錯處。奈何電視台一直搵我做衝動警察，佢係要我做都冇辦法，𠵱家可以試吓唔同嘅角色。」
栢天男讚打得專業
Ron亦有為角色特別設計點樣去「亂嚟」：「我同武指夾過點樣打佢哋(張建聲手下)，我唔望住佢哋係咁打，你話驚唔驚呀？真係打得好痛快。」栢天男又讚被Ron打得好舒服：「佢打過嚟好兇猛，我畀佢啲氣場嚇到，但佢出拳到位即停，既準確又專業，完全唔會打到肉。」Ron得戚說：「你估我唔傷㗎！我都會扭親嘛。」
栢天男今次挑戰好多頁對白：「今次有型男教路會比上次再做得好啲。」Ron得戚說：「張建聲教得你最多喎，佢好鍾意教人做戲，唔止後輩連前輩都教，仲教我點樣可以打得狼啲。」至於譚耀文最難忘拍一場被吊高嘅戲，落地時意外裂咗3條肋骨。Ron又鬼馬笑說：「你就頂得住啫，當日張建聲擦損少少就鬼殺咁嘈話自己受咗傷，我忍咗好耐，趁佢𠵱家唔在場舉報佢。」
更多第5波疫情資訊，請到以下專頁瀏覽（按此）
立即下載 | 全新《星島頭條》APP : https://bit.ly/3yLrgYZ
最新回應